تہران (نیشنل ٹائمز) ایرانی پاسدارانِ انقلاب نے آبنائے ہرمز بند کرنے کا اعلان کر دیا ہے۔ ایران کی پاسدارانِ انقلاب فورس کی جانب سے جاری بیان میں کہا گیا ہے کہ آبنائے ہرمز کو بند کر دیا گیا ہے اور فی الحال کسی بھی جہاز کو اس گزرگاہ سے گزرنے کی اجازت نہیں دی جائے گی۔

برطانوی میڈیا کے مطابق دنیا کے خام تیل کا تقریباً پانچواں حصہ آبنائے ہرمز کے راستے سے گزرتا ہے۔ یہ آبی گزرگاہ تقریباً 40 کلومیٹر چوڑی ہے اور عالمی توانائی کی ترسیل میں نہایت اہم کردار ادا کرتی ہے۔

خبر ایجنسیوں کے مطابق سعودی عرب، متحدہ عرب امارات، کویت اور ایران سمیت خلیجی ممالک سے تیل کی بڑی مقدار اسی راستے کے ذریعے دیگر ممالک تک پہنچائی جاتی ہے۔

دنیا میں سب سے زیادہ ایل این جی برآمد کرنے والا ملک قطر بھی اپنی برآمدات کے لیے اسی آبی گزرگاہ پر انحصار کرتا ہے۔

مزید یہ کہ اوپیک کے رکن ممالک اپنی بڑی مقدار میں خام تیل کی برآمدات ایشیائی ممالک تک آبنائے ہرمز کے ذریعے ہی کرتے ہیں، جس کے باعث اس گزرگاہ کی بندش عالمی منڈیوں پر گہرے اثرات مرتب کر سکتی ہے۔