بیجنگ (شِنہوا) کمیونسٹ پارٹی آف چائنہ (سی پی سی) کی مرکزی کمیٹی کے جنرل سیکرٹری شی جن پھنگ نے پیر کے روز عوامی جمہوریہ کوریا (ڈی پی آر کے) کی ورکرز پارٹی آف کوریا (ڈبلیو پی کے) کی 9 ویں کانگریس میں کم جونگ اُن کو دوبارہ جنرل سیکرٹری منتخب ہونے پر مبارکباد پیش کی ہے۔
اپنے پیغام میں شی نے اس بات کا ذکر کیا کہ ڈبلیو پی کے کی 8 ویں کانگریس کے بعد سے کم جونگ اُن کی سربراہی میں پارٹی کی مرکزی کمیٹی نے عوامی جمہوریہ کوریا کے عوام کو متحد کیا اور سخت محنت کے ذریعے ملک میں سوشلسٹ تعمیر کے مقصد میں مسلسل نئی کامیابیاں حاصل کیں۔
شی نے کہا کہ کامریڈ کم کا ڈبلیو پی کا دوبارہ جنرل سیکرٹری منتخب ہونا عوامی جمہوریہ کوریا کی پارٹی، حکومت اور عوام کے ان پر گہرے اعتماد اور بھرپور حمایت کی عکاسی کرتا ہے۔
انہوں نے مزید کہا کہ ڈبلیو پی کے کی 9 ویں کانگریس کا ایک ایسے اہم موڑ پر کامیابی سے منعقد ہونا انتہائی اہمیت کا حامل ہے، جب پارٹی اور ملک کے معاملات ایک ایسے مرحلے میں داخل ہو رہے ہیں جو ماضی کی بنیادوں پر مستقبل کا رخ متعین کرے گا۔
انہوں نے اس امید کا اظہار کیا کہ جنرل سیکرٹری کی قیادت میں عوامی جمہوریہ کوریا کی پارٹی اور عوام اس کانگریس کو ایک موقع کے طور پر استعمال کرتے ہوئے ملک کے سوشلسٹ مقصد کے لئے مسلسل نئی راہیں کھولیں گے۔
شی نے اس بات پر زور دیا کہ چین اور عوامی جمہوریہ کوریا سوشلسٹ پڑوسی دوست ہیں جو ایک دوسرے کے ساتھ کھڑے ہیں اور کمیونسٹ پارٹی آف چائنہ اور چینی حکومت کی یہ غیر متزلزل پالیسی ہے کہ دونوں ممالک کے تعلقات کو محفوظ، مستحکم اور مزید بہتر بنایا جائے۔