باجوڑ (نیشنل ٹائمز) ضلع باجوڑ کے علاقے ماموند میں ملنگی مدرسہ چیک پوسٹ کے قریب خودکش گاڑی دھماکے کے نتیجے میں کم از کم سات پولیس اور فرنٹیئر کور کے اہلکار شہید ہو گئے، جبکہ متعدد افراد زخمی ہو گئے ہیں۔

ذرائع کے مطابق حملہ آوروں نے بارود سے بھری گاڑی کو چیک پوسٹ سے ٹکرا دیا جس کے نتیجے میں زور دار دھماکا ہوا۔ دھماکے سے مدرسہ مکمل طور پر منہدم ہو گیا جبکہ قریبی گھروں اور دکانوں کو بھی شدید نقصان پہنچا ہے۔

ابتدائی اطلاعات کے مطابق شہداء میں دو کمسن بچے بھی شامل ہیں جو قریبی علاقے میں موجود تھے۔ امدادی ٹیمیں فوری طور پر موقع پر پہنچ گئیں اور ملبے سے لاشوں اور زخمیوں کو نکالنے کا سلسلہ جاری ہے۔ زخمیوں کو قریبی اسپتال منتقل کیا جا رہا ہے جہاں بعض کی حالت تشویشناک بتائی جاتی ہے۔

سیکیورٹی ذرائع کا کہنا ہے کہ جوابی کارروائی میں آٹھ دہشتگرد مارے گئے ہیں، تاہم اس حوالے سے سرکاری سطح پر مزید تفصیلات جاری کی جا رہی ہیں۔ علاقے کو گھیرے میں لے کر سرچ آپریشن شروع کر دیا گیا ہے۔