اسلام آباد(نیشنل ٹائمز) ایف بی آر رواں مالی سال جولائی 2025 سے جنوری 2026 تک 372 ارب روپے ہدف سے کم حاصل کر سکا۔
ایف بی آر کی دستاویز کے مطابق ایف بی آر 30 جنوری 2026 تک 986 ارب روپے ٹیکس وصول کر سکا، جنوری کیلئے ایف بی آر کا ہدف 1 ہزار 31 ارب روپے مقرر کیا گیا تھا، جنوری سے مارچ کے دوران سپر ٹیکس کی مد میں 200 ارب روپے کی وصولی متوقع ہے۔دستاویز کے مطابق جولائی سے جنوری کے دوران ایف بی آر مجموعی طور پر 7 ہزار 147 ارب روپے جمع کر سکا، جنوری میں انکم ٹیکس کی مد میں 452 ارب روپے کی نسبت کلیکشن 465 ارب روپے رہی، سیلز ٹیکس کا ہدف 387 ارب روپے مختص تھا اور کلیکشن 352 ارب روپے تک رہی ۔اسی دوررانیہ میں کسٹمز ڈیوٹی کی مد میں ہدف 126 ارب روپے کا ہدف تھا مگر اب تک کلیکشن 107 ارب روپے جمع ہوسکے، فیڈرل ایکسائز ڈیوٹی کی مد میں ٹارگٹ 65 ارب روپے جبکہ کلیکشن 61 ارب روپے تک رہی۔جنوری کے دوران 47 ارب اور جولائی سے جنوری 340 ارب روپے ٹیکس ریفنڈز جاری کیے، گزشتہ مالی سال اسی عرصے کے دوران 314 ارب روپے کے ٹیکس ریفنڈز جاری کیے تھے، آئی ایم ایف سے مارچ 2026 تک 9917 ارب ٹیکس محصولات جمع کرنے کا معاہدہ ہے۔ایف بی آر کو دو ماہ کی مدت میں مزید 2 ہزار 765 ارب روپے سے زائد اکٹھے کرنا ہوں گے، جولائی سے جنوری کیلئے ایف بی آر کا ہدف 7 ہزار 521 ارب روپے مختص کیا گیا تھا، گزشتہ مالی سال 2024-25 کے پہلے سات ماہ میں 6 ہزار 699 ارب روپے ٹیکس کلیکشن تھی۔