اسلام آباد (نیشنل ٹائمز) وزیراعظم شہباز شریف نے کہا ہے کہ انہوں نے غزہ پیس بورڈ میں اس امید کے ساتھ شمولیت اختیار کی ہے کہ غزہ میں امن قائم ہو سکے گا۔
لندن میں میڈیا سے گفتگو کرتے ہوئے وزیراعظم نے بتایا کہ پاکستان کو غزہ پیس بورڈ میں شمولیت کی باضابطہ دعوت دی گئی تھی، جس کے بعد وفاقی کابینہ نے اس میں شامل ہونے کی منظوری دی۔
وزیراعظم شہباز شریف کا کہنا تھا کہ غزہ پیس بورڈ میں شمولیت کا مقصد غزہ میں پائیدار امن کا قیام ہے۔ انہوں نے امید ظاہر کی کہ فلسطینی عوام کو عزت اور وقار کے ساتھ ان کے جائز حقوق ملیں گے اور غزہ کی تعمیر نو کا عمل شروع ہو سکے گا۔
وزیراعظم نے اپنے دورۂ ڈیووس کو کامیاب قرار دیتے ہوئے کہا کہ وہاں آئی ایم ایف کی منیجنگ ڈائریکٹر سے مفید ملاقات ہوئی۔
انہوں نے مزید کہا کہ سابق امریکی صدر ڈونلڈ ٹرمپ نے پاکستان کے لیے نیک خواہشات کا اظہار کیا اور جنگ رکوانے میں کردار ادا کرنے پر ان کا شکریہ ادا کیا۔ وزیراعظم کے مطابق جنگ کے خاتمے سے جنوبی ایشیا میں لاکھوں جانیں بچ گئیں۔
