اسلام آباد (نیشنل ٹائمز)صدرمملکت آصف علی زرداری اور وزیراعظم شہباز شریف نے سعودی فرمانروا شاہ سلمان بن عبدالعزیز کی علالت پر اظہار تشویش کرتے ہوئے جلد تندرستی اور عمرِ دراز کی دعا کی۔صدر مملکت آصف علی زرداری نے شاہ سلمان بن عبدالعزیز کیلئے نیک خواہشات کا پیغام بھجوایا، اور کہا کہ خادم الحرمین الشریفین کی صحت کیلئے پوری پاکستانی قوم دعاگو ہے۔آصف علی زرداری کا کہنا تھا کہ پاکستانی قوم کے دلوں میں شاہ سلمان بن عبدالعزیز کا بے حد احترام ہے، اللہ تعالیٰ شاہ سلمان کو تندرستی،عمرِ دراز اور قیادت کی مزید ہمت عطا فرمائے۔وزیراعظم شہباز شریف نے بھی سعودی فرمانروا شاہ سلمان بن عبدالعزیز کی علالت پر اظہار افسوس کیا اور کہا اس خبر پر گہری تشویش ہے کہ خادم الحرمین شریفین ہسپتال میں داخل ہیں۔وزیراعظم کا مزید کہنا تھا کہ پاکستان کے عوام سعودی فرمانروا کی عزت و تکریم کرتے ہیں، خادم الحرمین الشریفین کی جلد اور مکمل صحت یابی کیلئے دعا گو ہیں۔خیال رہے کہ سعودی فرمانروا شاہ سلمان بن عبدالعزیز کو طبی معائنے کے بعد ہسپتال سے گھر منتقل کر دیا گیا ہے، شاہ سلمان کے میڈیکل ٹیسٹ تسلی بخش قرار دیے گئے ہیں۔