ہانگ کانگ(شِنہوا)ہانگ کانگ خصوصی انتظامی علاقے (ایچ کے ایس اے آر) کے چیف ایگزیکٹو جان لی نے ہانگ کانگ کے علاقے تائی پو کی رہائشی عمارت میں لگنے والی آگ کے متاثرین کو خراج عقیدت پیش کرنے کے لئے حکومت کے اعلیٰ حکام اور سول سرونٹس کے ہمراہ سرکاری ہیڈکوارٹرز میں ایک یادگاری تقریب میں شرکت کی۔
یادگاری تقریب ہفتے کی صبح تقریباً 8 بجے شروع ہوئی۔ قومی پرچم اور ایچ کے ایس اے آر کا پرچم سرنگوں رہا اور وہاں موجود تمام حکام نے آگ کے متاثرین کی یاد میں 3 منٹ کی خاموشی اختیار کی۔
ایچ کے ایس اے آر میں مرکزی عوامی حکومت کے رابطہ دفتر، ایچ کے ایس اے آر میں مرکزی عوامی حکومت کے دفتر برائے قومی سلامتی تحفظ، ایچ کے ایس اے آر میں چینی وزارت خارجہ کے کمشنر دفتر اور عوامی جمہوریہ چین کی پیپلز لبریشن آرمی کے ہانگ کانگ گیریژن نے بھی ہفتہ کی صبح خاموشی اختیار کی اور پرچم سرنگوں رکھے۔
ایچ کے ایس اے آر حکومت کے مطابق تمام سرکاری عمارتوں اور تنصیبات پر لہرائے جانے والے قومی پرچم اور ایچ کے ایس اے آر کے پرچم ہفتہ سے پیر تک سرنگوں رہیں گے۔ اس دوران سرکاری حکام غیر ضروری عوامی سرگرمیوں میں شرکت نہیں کریں گے۔
حکومت کی جانب سے منعقدہ یا حکومتی مالی اعانت کے تمام تفریحی اور جشن کی تقاریب منسوخ یا مناسب طور پر موخر کر دی جائیں گی۔
سوگ کے اس دورانیے میں حکومت شہر کے تمام 18 اضلاع میں تعزیتی مقامات قائم کرے گی تاکہ عوام تعزیتی کتابوں پر دستخط کر سکیں اور متاثرین کے لئے سوگ منا سکیں۔
ایچ کے ایس اے آر حکومت کے مطابق بدھ کی دوپہر کو وانگ فوک کورٹ رہائشی کمپلیکس میں لگنے والی آگ سے ہلاک ہونے والوں کی تعداد جمعہ تک 128 تک پہنچ گئی تھی۔