لاہور(نیشنل ٹائمز) پاکستان ہاکی فیڈریشن (پی ایچ ایف ) نے 12 کھلاڑیوں کوسینٹرل کنٹریکٹ دینے کا اعلان کیا ہے۔ جن کھلاڑیوں کو سینٹرل کنٹریکٹ دینے کا اعلان کیا گیا ہے ان میں قومی ہاکی ٹیم کے کپتان رضوان سینئر شامل نہیں ہیں۔قومی کھیل ہاکی کے امور کی نگران پاکستان ہاکی فیڈریشن کے سیکریٹری آصف باجوہ نے سلیکشن کمیٹی کے چیئرمین منظور جونیئر اور ہیڈ کوچ خواجہ جنید کے ہمراہ پریس کانفرنس سے خطاب کرتے ہوئے کہا کہ سینٹرل کنٹریکٹ کو کھلاڑی کی فٹنس سے مشروط کردیا گیا ہے۔ آصف باجوہ کے مطابق 20 کھلاڑیوں کو سینٹرل کنٹریکٹ دینا تھا لیکن 31 کھلاڑیوں میں سے صرف12کھلاڑی ہی معیار پہ پورا اُترسکے۔انہوں نے بتایا کہ جن کھلاڑیوں کو سینٹرل کنٹریکٹ نہیں دیا گیا ہے ان میں قومی ہاکی ٹیم کے کپتان رضوان سینیئر، امجد علی، اظفر یعقوب، رانا وحید اور رانا سہیل بھی شامل ہیں۔ انہوں ںے کہا کہ یہ کھلاڑی فٹنس کے معیار پہ پورا نہیں اتر سکے ہیں۔