راولپنڈی (نیشنل ٹائمز)صرافہ جیمز اینڈ جیولرز ایسوسی ایشن اور زرگران نے ایف بی آر کی جانب سے غیر قانونی چھاپوں کے خلاف مری روڈ پر احتجاجی کیمپ لگا کر مظاہروں کا آغاز کر دیا۔
اس احتجاج میں راولپنڈی اور اسلام آباد کی مختلف یونینز کے عہدیداران اور اراکین نے بھرپور شرکت کی۔ رہنماؤں نے کہا کہ جب تک ایف بی آر انتظامیہ جیمز اینڈ جیولرز کے حقیقی نمائندوں سے بامقصد مذاکرات نہیں کرتی، یہ پرامن احتجاج جاری رہے گا۔مری روڈ جیولرز ایسوسی ایشن کے صدر رانا عبدالقدوس، جیمز اینڈ جیولرز ایسوسی ایشن کے صدر شیخ آصف ادریس اور محمد فیاض قریشی نے خطاب کرتے ہوئے کہا کہ ملک بھر میں چھوٹے بڑے شہروں میں تاجر ایف بی آر کے رویے کے خلاف سراپا احتجاج ہیں۔ ہراسمنٹ ناقابل قبول ہے ۔ حکومت سٹیک ہولڈرز کے حقیقی نمائندوں سے بات چیت کرے اور غیر قانونی چھاپے بند کیے جائیں۔ مقررین نے کہا کہ ماضی میں سونا چار ہزار روپے تولہ تھا، آج چار لاکھ روپے تولہ تک پہنچ چکا ہے ۔ انہوں نے واضح کیا کہ اگر ایف بی آر نے چھاپے اور ہراساں کرنا بند نہ کیا تو ملک گیر شٹر ڈاؤن ہڑتال کی کال دی جائے گی۔سونے کی بڑھتی قیمتوں اور مہنگائی سے کاروبار متاثر ہے ، حکومت فوری مسائل حل کرے۔