اسلام آباد (نیشنل ٹائمز) پاکستان پیپلز پارٹی نے وزیراعظم کے سیلاب زدہ علاقوں میں بجلی کے بل معطل کرنے کے فیصلے کا خیرمقدم کیا ہے اور اسے متاثرین کے لیے بڑا ریلیف قرار دیا ہے۔ مرکزی ترجمان پاکستان پیپلز پارٹی پارلیمنٹر ینز شازیہ مری نے کہا کہ یہ ریلیف چیئرمین بلاول بھٹو زرداری کے مطالبے کے بعد دیا گیا ہے، جنہوں نے وفاقی حکومت سے سیلاب متاثرہ علاقوں کے بجلی کے بل معاف کرنے کا مطالبہ کیا تھا۔اپنے جاری ایک بیان میں شازیہ مری کا کہنا تھا کہ پیپلز پارٹی نے وفاقی حکومت کے ماحولیاتی اور زرعی ایمرجنسی کے اعلان کو بھی خوش آئند قرار دیا ہے جو چیئرمین بلاول کے پہلے مطالبے کے عین مطابق ہے۔ انہوں نے کہا کہ بلاول بھٹو نے متاثرہ کسانوں کو مفت بیج اور کھاد فراہم کرنے، قرضوں میں ریلیف دینے اور سیلاب متاثرین کو معاوضہ ادا کرنے کا مطالبہ بھی کیا ہے۔ شازیہ مری نے بتایا کہ چیئرمین پیپلز پارٹی نے حکومت پر زور دیا ہے کہ وہ اقوام متحدہ اور دیگر عالمی اداروں کے ذریعے فوری طور پر بین الاقوامی امداد کی اپیل کرے۔ انہوں نے حکومت کی فلیش اپیل میں تاخیر پر تشویش کا اظہار کیا اور کہا کہ لاکھوں متاثرین کو عالمی امداد سے محروم کرنے کی کوئی وجہ نہیں ہو سکتی۔ترجمان نے مزید کہا کہ پیپلز پارٹی نے چیئرمین بلاول کی ہدایات پر سینیٹ اور قومی اسمبلی دونوں میں قراردادیں جمع کرائی ہیں، تاہم وفاقی حکومت نے تاحال بی آئی ایس پی کے ذریعے سیلاب متاثرہ خاندانوں کے لیے ریلیف کا اعلان نہیں کیا جو انتہائی تشویشناک ہے۔شازیہ مری نے مطالبہ کیا کہ وفاقی حکومت فوری طور پر تمام متاثرہ افراد اور خاندانوں کے لیے بروقت ریلیف یقینی بنائے۔