کراچی(نیشنل ٹائمز)وفاقی حکومت نے کراچی حیدرآباد پیکج کے تحت ایم کیو ایم پاکستان کے ارکان قومی اسمبلی کے لیے 20 ارب روپے جاری کر دیے۔
ایم کیو ایم پاکستان کےکراچی اور حیدرآباد سے تعلق رکھنے والے ارکان قومی اسمبلی نے اپنے اپنے علاقوں کی ترقیاتی اسکیمیں پاکستان انفرا اسٹرکچر ڈیولپمنٹ کمپنی لمیٹڈ(پی آئی ڈی سی ایل ) کے پاس جمع کرا دی ہیں جس نے ان کاموں کی اسکروٹنی مکمل کر لی ہے۔سی ڈی ڈبلیو پی سے یہ اسکیمیں گزر چکی ہیں اور جلد ایکنک سے منظوری کے بعد ٹینڈرنگ کا عمل شروع کر دیا جائے گا، یہ فنڈ کراچی کے لیے 15ارب اورحیدرآباد کے لیے 5 ارب روپے مختص کیا گیا ہے، اس فنڈ سے فلائی اوور، پانی سوریج اور سڑکوں کی تعمیر و مرمت اور عوامی دلچسپی کے دیگر منصوبے مکمل کیے جائیں گے۔پی آئی ڈی سی ایل ذرائع نے ناصرف یہ ترقیاتی فنڈ اکاؤنٹ میں منتقل ہونے کی تصدیق کی بلکہ بتایا کہ مسلم لیگ ن کے خیبر پختونخواہ سے تعلق رکھنے والے ارکان قومی اسمبلی کے لیے بھی 3ارب روپے کا ترقیاتی فنڈ وفاق سے موصول ہو گیا ہے جبکہ سیپ کی مد میں 3 ارب روپے کا فنڈ الگ سے آیا ہے۔اس طرح مجموعی طور پر 26 ارب روپے کی رقم جاری ہوئی ہے 20ارب کے علاوہ سیپ کے تحت پہلے ہی کراچی میں ایم کیو ایم سے تعلق رکھنے والے ارکان قومی اسمبلی کو فی رکن 25کروڑ روپے کا فنڈ دیا گیا ہے، ان اسکیموں کے کراچی میں 400 میں سے 100 کے قریب ٹینڈر اور ٹھکیداروں کو ورک آڑدر دینے کا عمل مکمل ہو چکا ہے، کراچی کے لیے وفاقی حکومت کی طرف سےجاری ہونے والے اس فنڈ سے شہر میں آئندہ کچھ عرصے میں بڑے پیمانے پر ترقیاتی کام ہوتے نظر آئیں گے۔واضح رہے کہ پی آئی ڈی سی ایل سے پہلے ارکان اسبلی کے کام وزارت ہاؤسنگ کے ماتحت پاک پی ڈبلیو ڈی انجام دیتا تھا، اس کے خاتمے کے اب وزارت ہاؤسنگ نے پی ڈی آئی ایل سی ایل قائم کیا ہے۔