برسلز (نیشنل ٹائمز) چیئرمین کشمیر کونسل یورپ، علی رضا سید نے عظیم حریت رہنما مرحوم سید علی گیلانی کو یاد کرتے ہوئے کہا ہے کہ انہوں نے جموں و کشمیر کی آزادی کے لیے ایک چٹان کی طرح ڈٹ کر جدوجہد کی، جسے کبھی فراموش نہیں کیا جا سکتا۔

سید علی گیلانی کی چوتھی برسی کے موقع پر جاری کیے گئے بیان میں علی رضا سید نے کہا کہ مرحوم رہنما نے تحریک آزادی کشمیر کے لیے اپنی زندگی میں طویل عرصے تک قید و بند کی صعوبتیں برداشت کیں۔ انہوں نے مشکلات کے باوجود اپنے اصولوں سے کبھی پیچھے نہیں ہٹے اور کشمیریوں کی بھرپور قیادت اور رہنمائی کی۔

علی رضا سید نے کہا، “سید علی گیلانی نے کشمیریوں کی تین نسلوں کو اپنی انتھک جدوجہد سے متاثر کیا۔ وہ کشمیریوں کے ہیرو اور کشمیر کی سچی آواز تھے۔” انہوں نے مزید کہا کہ گیلانی نے اپنے بلند و بالا مقاصد پر کبھی سمجھوتہ نہیں کیا اور کشمیر کاز کے لیے ان کی محبت اور وابستگی انہیں ہمیشہ یاد رکھا جائے گا۔

چیئرمین کشمیر کونسل ای یو نے کہا کہ علی گیلانی جیسی عظیم شخصیات صدیوں بعد پیدا ہوتی ہیں اور ان کی رہنمائی و جدوجہد کے اثرات طویل مدت تک باقی رہیں گے۔ انہوں نے کہا، “علی شاہ گیلانی پہاڑ کی طرح کشمیری حق خودارادیت کے موقف پر ثابت قدم رہے۔”