ویب ڈیسک(نیشنل ٹائمز) لاہور میں موسلا دھار بارشوں کے سبب جناح اسپتال کی ایمرجنسی سمیت مختلف وارڈز کی چھتیں ٹپکنا شروع ہوگئیں۔
بارش کا پانی انڈور اور آؤٹ ڈور سمیت مختلف وارڈز اور راہداریوں میں بھی آگیا، مریض اور ان کے تیمار دار مشکلات میں گھر گئے۔بتایا جارہا ہے کہ جن عمارتوں کی حال ہی میں تزئین وآرائش کی گئی تھی ان میں بھی بارش کا پانی آگیا، پانی کی وجہ سے مریضوں اور ان کے تیمارداروں کو سخت مشکلات کا سامنا ہے۔اسپتال کے ایم ایس (ماسٹر آف سرجری) ڈاکٹر محسن کا کہنا ہے کہ ایمرجنسی کی چھت پر نکاسی پائپ صحیح طریقے سے نہیں لگایا گیا تھا، اس لیے چھت ٹپکنے لگی۔انہوں نے کہا کہ عملے نے فوری ایکشن لیتے ہوئے پانی نکال دیا ہے، واسا کی گاڑیوں نے اسپتال کے باہر سے بھی پانی نکال دیا ہے۔واضح رہے کہ پنجاب کے بپھرے دریاؤں میں سیلابی کیفیت برقرار ہے، پانی کی سطح معمول پر نہ آسکی، ریلا آبادی میں داخل ہونےکے بعد مزید کئی دیہات ڈوب گئے، صوبے میں سیلاب کے باعث مختلف حادثات میں اموات کی تعداد 30 سے زائد ہوگئی۔