ویب ڈیسک(نیشنل ٹائمز)فیصل آباد میں سیلاب سے متاثرہ علاقے ٹھٹہ جیون میں جیو نیوز کی ٹیم پر پیرا فورس کے اہلکاروں کی جانب سے تشدد کیا گیا اور کیمرہ مین سے کیمرہ بھی چھین لیا گیا۔
پیرا فورس کے اہلکاروں نے جیو نیوز کے رپورٹر عرفان اللہ کو گردن سے پکڑ کر دھکے دیے اور نیچےگرا دیا، کیمرہ مین علی ارسلان کے ویڈیو بنانے پر ریجنل ڈائریکٹرپیرا فورس زبیر گیلانی برہم ہو گئے جس پر اہلکاروں نے کیمرہ چھین لیا۔ پیرا فورس کے اہلکاروں نے کیمرہ مین علی ارسلان کو تھپڑ بھی مارے۔پیرا فورس کے ریجنل ڈائریکٹر زبیر گیلانی نے سیلاب سے متاثرہ شخص کو انٹرویو دینے پر ڈانٹ ڈپٹ کی اور کہا کیا تماشا لگا رکھا ہے، متاثرہ شخص جیو نیوز کی ٹیم سے سیلاب متاثرین کے لیے امدادی سہولتوں کے فقدان پر گفتگو کر رہا تھا۔پیرا فورس کے ریجنل ڈائریکٹر نے رپورٹر عرفان اللہ کو دھمکی آمیز لہجے میں علاقے سے نکلنے کا حکم بھی دیا۔بعد ازاں جیو نیوز سے گفتگو کرتے ہوئے ریجنل ڈائریکٹر پیرا فورس زبیر گیلانی کا کہنا تھا یہ ہماری ریاستی ذمہ داری ہے کہ سیلاب سے متاثرہ علاقوں میں جانے سے عوام کو روکا جائے، ہمارا کام حکومت کی جانب سے بنائی گئی پالیسی پر عمل درآمد کرانا ہوتا ہے، اگر اس جگہ پر ہمارا فیملی ممبر بھی ہو گا تو اسے روکا جائے گا۔زبیر گیلانی کا کہنا تھا اگر ہم سے کسی قسم کی زیادتی ہوئی ہے تو ہم اس پر معذرت خواہ ہیں۔دوسری جانب جیو نیوز کے رپورٹر نے زبیر گیلانی کے بیان پر کہا کہ ہم کسی کو ساتھ نہیں لائے، وہاں جو لوگ موجود تھے ان سے بات کر رہے تھے۔