راولپنڈی (نیشنل ٹائمز) ہولی فیملی اسپتال میں ڈاکٹروں کی مبینہ غفلت کے باعث 11 سالہ بچی کائنات جان کی بازی ہار گئی۔ بچی کو پیٹ میں درد کی شکایت پر تین روز قبل اسپتال میں داخل کروایا گیا تھا۔

والد کے مطابق اسپتال کے ڈاکٹرز پیٹ درد کی درست تشخیص نہ کر سکے اور بغیر تصدیق کے بچی کا اپینڈکس کا آپریشن کر دیا۔ آپریشن کے بعد بھی بچی پیٹ درد سے مسلسل تڑپتی رہی، جس کی فوٹیج بھی منظر عام پر آ گئی ہے، جس میں بچی کو شدید تکلیف میں مبتلا دیکھا جا سکتا ہے۔

کائنات کا تعلق ڈھوک چوہدریاں سے تھا۔ اہلِ خانہ کا مؤقف ہے کہ ڈیوٹی پر موجود ڈاکٹر کی مبینہ لاپرواہی اور غفلت کی وجہ سے بچی کی جان گئی۔

واقعے کے بعد بچی کے لواحقین نے کائنات کی میت وصول کرنے سے انکار کر دیا، جب کہ اسپتال انتظامیہ کی جانب سے کوئی تسلی بخش وضاحت نہ دی جا سکی۔

دوسری جانب ہولی فیملی اسپتال کے میڈیکل سپرنٹنڈنٹ (ایم ایس) ڈاکٹر اعجاز بٹ نے واقعے کا نوٹس لیتے ہوئے تین رکنی تحقیقاتی کمیٹی تشکیل دے دی ہے، جو معاملے کی مکمل چھان بین کرے گی۔