اسلام آباد(نیشنل ٹائمز) جمعیت علمائے اسلام (جے یو آئی) کے رہنما حافظ حمداللہ کا کہنا ہےکہ دونوں ایوانوں سے انسداد دہشت گردی ایکٹ پاس ہونا آئین اورجمہوریت کے چہرے پرطمانچہ ہے۔
ایک بیان میں حافظ حمداللہ نے پارلیمنٹ سے انسداد دہشت گردی ایکٹ کی منظوری پر شدید ردعمل دیتے ہوئے اسے آئین اور جمہوریت کے چہرے پر طمانچہ قرار دیا ہے۔حافظ حمداللہ نے اپنے بیان میں کہا کہ یہ قانون بدترین کالا قانون ہے، جسے انہوں نے “رولٹ ایکٹ کا دوسرا نام” قرار دیا۔ ان کے مطابق اسی رولٹ ایکٹ کے خلاف بانی پاکستان قائداعظم محمد علی جناح نے انگریز اسمبلی کے فلور پر مخالفت کرتے ہوئے استعفیٰ دیا تھا۔انہوں نے سوال اٹھایا کہ25 دسمبر کو یہی حکومتی پارٹیاں اور ان کے سہولت کار قائداعظم کا یوم ولادت کس منہ سے منائیں گے؟ان کا مزید کہنا تھا کہ یہ قانون قائداعظم کے نظریات اور آئین کی روح کے صریحاً خلاف ہے، اور جمعیت علمائے اسلام اس سیاہ قانون کو مسترد کرتی ہے۔یاد رہےکہ انسداد دہشت گردی ایکٹ حال ہی میں قومی اسمبلی اور سینیٹ دونوں سے منظور کیا گیا ہے، جس پر ملک بھر کی مختلف سیاسی جماعتوں کی جانب سے ملے جلے ردعمل سامنے آ رہے ہیں۔