کوئٹہ( نیشنل ٹائمز)کوئٹہ سمیت بلوچستان بھر میں موبائل انٹرنیٹ ڈیٹا سروس سکیورٹی خدشات کی بنا پر معطل کر دی گئی۔بلوچستان کے صوبائی حکام نے بتایا کہ کوئٹہ سمیت بلوچستان بھر میں موبائل انٹرنیٹ ڈیٹا سروس سکیورٹی خدشات پر بند کی گئی ہے، موبائل انٹرنیٹ ڈیٹا سروس 15 اگست تک معطل رہنے کا امکان ہے۔پاکستان ٹیلی کمیونیکیشن اتھارٹی (پی ٹی اے) حکام کے مطابق بلوچستان کے مختلف اضلاع کوہلو، چمن، قلعہ عبداللہ، پشین، لورالائی، زیارت، قلعہ سیف اللہ، نوشکی اور ہرنائی میں موبائل انٹرنیٹ سروس غیر معینہ مدت کے لئے معطل کر دی گئی ہے۔حکام کا کہنا ہے یہ اقدام ممکنہ سکیورٹی خدشات کے پیش نظر اٹھایا گیا ہے۔شہریوں نے کہا ہے کہ انٹرنیٹ سروس کی معطلی سے صوبے میں طلبہ آن لائن کلاسز میں شرکت سے قاصر ہیں، جبکہ فری لانسنگ اور آن لائن کاروبار سے وابستہ افراد کو شدید پریشانی کا سامنا ہے۔