اسلام آباد(نیشنل ٹائمز) وفاقی وزیر منصوبہ بندی احسن اقبال نے ریموٹ سینسنگ سیٹلائٹ کی کامیاب لانچنگ پر قوم کو مبارکباد پیش کی ہے۔
احسن اقبال نے ریموٹ سینسنگ سیٹلائٹ کی کامیاب لانچنگ پر سپارکو کی تمام ٹیم ، انجینئرز اور سائنسدانوں کو بھی مبارکباد پیش کرتے ہوئے کہا کہ چین کے بھرپور تعاون پر شکرگزار ہیں۔انہوں نے کہا کہ سیٹلائٹ کامیابی سے اپنے مدار میں پہنچ گیا ہے، پاکستان کو اسپیس ٹیکنالوجی میں دوبارہ قائدانہ کردار دلائیں گے، آئندہ سال چین کی مدد سے آسٹرو ناٹ خلا میں بھیجا جائے گا اور 2035 تک ہم چاند پر پہنچنے کے پروگرام کو بھی کامیابی سے مکمل کریں گے۔واضح رہےکہ پاکستان کی جانب سے نیا ریموٹ سینسنگ سیٹلائٹ لانچ کیا گیا ہے جس کے بعد مجموعی طور پر 4 ریموٹ سینسنگ سیٹلائٹس ابھی تک خلا میں بھیجے جاچکے ہیں۔اس سیٹلائٹ کے تحت سیلاب جیسی صورتحال سے متعلق ارلی وارننگ جاری کرکے نقصان سے بچاجاسکتا ہے جب کہ گلیشیئرز اور واٹر فلو کی بھی مانیٹرنگ کی جاسکتی ہے۔