اسلام آباد (نیشنل ٹائمز) وفاقی تحقیقاتی ادارے (ایف آئی اے) میں بڑے پیمانے پر ترقیاں عمل میں لائی گئی ہیں، جہاں 26 اسسٹنٹ ڈائریکٹرز کو گریڈ 17 سے گریڈ 18 میں ترقی دے کر ڈپٹی ڈائریکٹرز کے عہدے پر فائز کر دیا گیا ہے۔

ترقیوں کی منظوری ڈیپارٹمنٹل پروموشن کمیٹی (ڈی پی سی) کی سفارشات کی روشنی میں دی گئی، جس کے بعد وزارت داخلہ نے باضابطہ طور پر ترقیوں کا نوٹیفکیشن جاری کر دیا ہے۔

ترقی پانے والے افسران میں اعجاز احمد، بابر، رضوان اسلم، بلال طارق، عامر اقبال، فہد خواجہ، ہارون ملک، سائم سلطان، جواد علی، رابعہ قریشی، عدیل عباس سمیت دیگر افسران شامل ہیں۔

ذرائع کے مطابق، ان میں سے کئی افسران پہلے ہی بطور ڈپٹی ڈائریکٹر فرائض انجام دے رہے تھے اور اب باقاعدہ طور پر ان کی ترقی عمل میں لائی گئی ہے۔

ایف آئی اے میں اس ترقیاتی عمل کو افسران و عملے کی جانب سے خوش آئند قرار دیا جا رہا ہے، اور ادارے میں ترقی پانے والے افسران کی محنت اور خدمات کو سراہا گیا ہے۔