لاہور (نیشنل ٹائمز) جوہرٹاؤن میں واقع فارم ہاؤس کے شیر نے حملہ کرکے خاتون اور 2 بچوں کو زخمی کر دیا۔
پولیس کے مطابق جوہرٹاؤن میں واقع فارم ہاؤس کے پالتو شیرکا پنجرا کھلا رہ گیا ۔ فوٹیج میں دیکھا جاسکتا ہے کہ شیر فارم ہاؤس کی دیوار پھلانگ کر سڑک پر آجاتا اور سامنے سے آنے والی خاتون کو زخمی کردیتا ہے ۔ اسی دوران فارم ہاؤس سے ایک شخص شیر کے پیچھے بھاگتا ہے او ر خاتون کو بچانے کی کوشش کرتاہے، شیر خاتون کو چھوڑ کر آگے بڑھ جاتا ہے اور 2بچوں کو زخمی کردیتا ہے ۔پولیس کےمطابق یہ فارم ہاؤس 2 بھائیوں ملک اعظم عرف شانی او ر ملک ناظم کا ہے ۔ شیر کے حملے سے زخمی 5 سالہ زویا، 7 سالہ اذہان اور 27سالہ ثمینہ کو اسپتال منتقل کردیا گیا ہے۔ڈی آئی جی آپریشنز فیصل کامران کا کہنا ہے کہ شہریوں کے جان ومال کا تحفظ اولین ترجیح ہے ۔ لاپرواہی کا مظاہرہ کرنے والو ں کے خلاف کارروائی کی جائے گی ۔ ترجمان محکمہ وائلڈ لائف کےمطابق ملک اعظم عرف شانی شیر کو لے کر رُوپوش ہوگیا ہے اور دونوں کی تلاش جاری ہے۔