اسلام آباد(نیشنل ٹائمز)وفاقی وزیر بحری امور جنید انوار چوہدری نے کہا ہے کہ بندرگاہوں کو تاجر دوست اور لاگت میں موثر بنایا جا رہا ہے، برآمدی چارجز میں کمی سے برآمدات میں نمایاں اضافہ متوقع ہے، بحری شعبے میں اصلاحات سمندری وسائل کے موثر استعمال کے لیے ضروری ہیں۔وفاقی وزیر بحری امور محمد جنید انوار چوہدری کی زیر صدارت وزارت بحری امور کے سٹریٹجک روڈ میپ کے حوالے سے پیر کے روز اجلاس منعقد ہوا۔ اس موقع پر معاشی ترقی کے لیے حکومتی اصلاحاتی ایجنڈے پر تفصیلی مشاورت کی گئی۔اجلاس کے دوران وفاقی وزیر نے پورٹ قاسم پر برآمدکنندگان کے چارجز میں 50 فیصد کمی کا اعلان کیا۔اس موقع پر گفتگو کرتے ہوئے وفاقی وزیر نے کہا کہ چارجز میں کمی سے تجارتی سہولتوں کو فروغ ملے گا،مقامی کاروبار کو فروغ دینا حکومت کی اولین ترجیح ہے،ماہی گیری اور بندرگاہی تجارت کے لیے ایکو کلچر زون کا قیام ہوگا،پہلی قومی میرین و ایکوکلچر پالیسی جلد متعارف کرائی جائے گی،میرین فشریز نے 410 ملین ڈالر کی برآمدات کا ہدف حاصل کرلیا ہے،شپ ری سائیکلنگ سے 6 ارب روپے کی آمدن حاصل ہوئی،ماحول دوست شپنگ پالیسیوں پر تیزی سے عملدرآمد جاری ہے،بندرگاہی انفراسٹرکچر اور کسٹمز نظام کی جدید کاری پر کام جاری۔بندرگاہوں کو تاجر دوست اور لاگت میں موثر بنایا جا رہا ہے۔برآمدی چارجز میں کمی سے برآمدات میں نمایاں اضافہ متوقع ہے۔بحری شعبے میں اصلاحات سمندری وسائل کے موثر استعمال کے لیے ضروری ہیں۔میرین معیشت کے فروغ کے لیے مربوط اقدامات اٹھائے جا رہے ہیں۔