سٹراس برگ (نیشنل ٹائمز) پاکستان کے اعلیٰ سطحی پارلیمانی وفد نے یورپی پارلیمنٹ میں معروف سیاسی جماعت ESN کے ممبران سے اہم ملاقات کی، جس میں خطے کے امن و استحکام اور دیگر اہم مسائل پر تبادلہ خیال کیا گیا۔ESN کے ممبران یورپی پارلیمنٹ نے پاکستانی وفد کا سٹراس برگ آمد پر بھرپور خیرمقدم کیا اور ان کے ساتھ قریبی تعاون کی خواہش کا اظہار کیا۔ملاقات کے دوران پارلیمانی وفد اور ESN گروپ کے MEPs نے علاقائی استحکام، انسداد دہشت گردی، اور باہمی دلچسپی کے دیگر اہم موضوعات پر تفصیلی گفتگو کی۔ پاکستانی وفد نے یورپی پارلیمانی ارکان کو بھارت کے جارحانہ رویے، یکطرفہ اقدامات، سندھ طاس معاہدے کو معطل کرنے، اور آبی وسائل کو جنگی ہتھیار کے طور پر استعمال کرنے کے حوالے سے مفصل بریفنگ دی۔وفد نے زور دے کر کہا کہ بھارت کی مسلسل اشتعال انگیزی کے باوجود پاکستان کا ردعمل تحمل، بردباری اور امن کے عزم کی مکمل عکاسی کرتا ہے۔ انہوں نے عالمی برادری سے اپیل کی کہ وہ خطے میں پائیدار امن کے قیام کے لیے بھارت پر دباؤ ڈالے تاکہ وہ عالمی قوانین اور معاہدات کی پاسداری کرے اور خطے میں کشیدگی کو کم کیا جا سکے۔