لاہور ( نیشنل ٹائمز) وفاقی حکومت کی جانب سے مالی سال 26-2025کے بجٹ میں ہائبرڈ گاڑیوں پر جنرل سیلز ٹیکس 18فیصد کرنے کی تجویز کے بعد ان گاڑیوں کی قیمتوں میں 10سے 14لاکھ روپے تک اضافہ ہوجائے گا۔رپورٹ کے مطابق اس سے پہلے ٹیکس کی موجودہ شرح 8.5فیصد تھی سے بڑھا کر 18فیصد کرنے کی تجویز دی گئی ہے ۔

اس تبدیلی کے نتیجے میں پاکستان میں دستیاب کئی مقبول ہائبرڈ ماڈلز کی قیمتوں میں نمایاں اضافہ ہوگا۔پاک وہیلز کے مرتب کردہ اعداد و شمار کے مطابق اگر یہ تجویز نافذ ہوتی ہے تو مختلف ہائبرڈ گاڑیوں کی قیمتوں میں 10لاکھ سے 14لاکھ روپے تک اضافہ ہوجائے گا۔گاڑیوں میں جی ایس ٹی میں مجوزہ اضافے نے آٹو مینوفیکچررز اور ممکنہ خریداروں دونوں میں تشویش پیدا کر دی ہے، ہائبرڈ گاڑیاں جنہیں اکثر ایندھن کی بچت اور ماحول دوست آپشن کے طور پر پیش کیا جاتا ہے نئے ٹیکس نظام کے تحت نمایاں طور پر مہنگی ہوجائیں گی۔آٹو انڈسٹری کے ماہرین نے تنبیہ کی ہے کہ یہ اقدام ہائبرڈ گاڑیوں کی مانگ کو کم کر سکتا ہے اور ملک کی ماحول دوست گاڑیوں پر منتقلی کے عمل کی رفتار کو سست کر سکتا ہے۔