لاہور (مظہر طفیل) لاہور میں سٹریٹ کرائم کی لہر پھیلانے والے خطرناک محمد علی ڈکیت گینگ کے دو اہم ارکان کو گرفتار کر لیا گیا۔

پولیس کے مطابق یہ گینگ صرف ایک ماہ کے دوران شہر کے مختلف علاقوں میں 60 سے زائد ڈکیتی، راہزنی، جھپٹا اور چوری کی وارداتوں میں ملوث رہا۔ تھانہ جوہر ٹاؤن کے ایس ایچ او محسن شہزاد کی قیادت میں انٹیلیجنس بیسڈ آپریشن کے دوران گینگسٹرز کی گرفتاری عمل میں لائی گئی۔

ایس ایچ او محسن شہزاد اور ان کی ٹیم نے شب و روز کی محنت سے گینگ کے دو اہم ارکان محمد علی اور مدثر رفیق کو گرفتار کیا، جو کہ متعدد سنگین مقدمات میں پولیس کو مطلوب تھے۔

ترجمان پولیس کے مطابق گرفتار ملزمان کے قبضے سے 13 چوری شدہ موبائل فون، موٹر سائیکل، نقدی، دو 30 بور پسٹل اور درجنوں گولیاں برآمد کی گئیں۔ کارروائی پر ایس پی صدر ڈاکٹر غیور احمد خاں نے ایس ایچ او محسن شہزاد اور ان کی ٹیم کو خراجِ تحسین پیش کیا اور کہا کہ سٹریٹ کرائم کو کنٹرول کرنا ان کی اولین ترجیح ہے۔
پولیس حکام کا کہنا ہے کہ ملزمان کے خلاف مقدمات درج کر کے انہیں مزید تفتیش کے لیے انویسٹیگیشن ٹیم کے حوالے کر دیا گیا ہے۔