لاہور (نیشنل ٹائمز) ایس پی صدر ڈاکٹر غیور احمد خاں کی ہدایت پر سٹریٹ کرائم میں ملوث گینگز کے خلاف کارروائیاں تیز کر دی گئی ہیں۔ ایس ایچ او تھانہ جوہر ٹاؤن کی پولیس ٹیم نے انٹیلیجنس بیسڈ آپریشن کے دوران بدنام زمانہ “محمد علی ڈکیت گینگ” کے دو ارکان کو گرفتار کر لیا ہے۔

ترجمان پولیس کے مطابق ملزمان کے قبضے سے چوری شدہ 13 موبائل فون، موٹر سائیکل، کیش، دو پسٹل (30 بور) اور درجنوں گولیاں برآمد ہوئیں۔ ملزمان لاہور کے مختلف علاقوں میں ڈکیتی، راہزنی، جھپٹا اور چوری کی وارداتوں میں ملوث تھے۔

گرفتار شدہ افراد لاہور شہر میں متعدد وارداتوں میں شامل پائے گئے ہیں۔ ملزمان میں گینگ کا سرغنہ محمد علی اور اس کا ساتھی مدثر رفیق شامل ہیں، جن کے خلاف مقدمات درج کر کے مزید تفتیش کے لیے انویسٹیگیشن ٹیم کو حوالہ کر دیا گیا ہے۔

ایس پی صدر ڈاکٹر غیور احمد خاں نے ایس ایچ او تھانہ جوہر ٹاؤن محسن شہزاد اور پولیس ٹیم کو کامیاب کارروائی پر شاباش دی ہے اور کہا ہے کہ سٹریٹ کرائم کو کنٹرول کرنا ان کی اولین ترجیحات میں شامل ہے۔