اسلام آباد(نیشنل ٹائمز)شازیہ مری مرکزی اطلاعات سیکریٹری پاکستان پیپلز پارٹی پارلیمنٹیرینز و رکن قومی اسمبلی شازیہ عطا مری نے کہا ہے کہ سلیکٹڈ وزیراعظم خیالی دنیا میں رہتے ہیں اور آٹا چینی گھی اور دال مہنگی کرنے والے سستی کاروں کا خواب بیچ رہے ہیں ۔ انہوں نے کہا کہ آج غریب کے لیئے موٹر سائیکل کا پیٹرول خریدنا پریشانی کا باعث ہے ۔ ان باتوں کا اظہار آج انہوں نے اپنے ایک جاری کردہ بیان میں کیا ہے۔ شازیہ مری نے کہا ہے کہ پی ٹی آئی حکومت نے شوگر اور دیگر امراض کی ادویات مہنگی کرکے نام نہاد صحت کارڈ کا ڈھنڈھورا پیٹا جا رہا ہے۔ انہوں نے کہاکہ عمران خان عوام کو بتائیں صحت کارڈ سے کتنے غریبوں کا علاج ہوا ہے اور ایک کروڑ نوکریاں دینے والوں نے لاکھوں لوگوں کو بیروزگار کردیا ہے۔ شازیہ مری نے کہا پچاس لاکھ گھر تعمیر کرنے کا خواب دکھاکر کروڑوں لوگوں کے گھر مسمار کیئے گئے ہیں اور اب ان جھوٹوں کی سرکار عوام کو مزید بیوقوف نہیں بنا سکتی۔