اسلام آباد ( نیشنل ٹائمز) ملک میں18 کروڑ سے زائد صارفین کے اکاؤنٹس کے پاسورڈ، حساس معلومات چوری ہونے کا انکشاف ہوا ہے۔

نیشنل کمپیوٹر ایمرجنسی رسپانس ٹیم نے ایڈوائزری جاری کردی جس میں کہا گیا ہے عالمی ڈیٹا لیک میں گوگل، فیس بک، ایپل سمیت بڑی کمپنیوں کے صارفین متاثر ہوئے ہیں۔

اسی طرح انسٹاگرام، سنیپ چیٹ سمیت حکومتی پورٹلز کی معلومات بھی چوری کی گئی ہیں، انفوسٹیلر میلویئر سے صارفین کے اکاؤنٹس کی معلومات چوری کی گئیں، پاکستانی صارفین فوری طور پر اپنے اکاؤنٹس کے پاسورڈ تبدیل کریں۔

ایڈوائزی میں کہا گیا ہے کہ ڈیٹا لیک سے شناخت چوری، اکاؤنٹ ہیکنگ اور رینسم ویئر حملوں کا خطرہ ہے، سرکاری اداروں اور مالیاتی اکاؤنٹس بھی متاثر ہونے کا خدشہ ہے، صارفین کی معلومات عام ویب سائٹس پر عوامی طور پر دستیاب ہیں، صارفین اپنے اکاؤنٹس دو مرحلہ جاتی توثیق کے عمل کو فعال کریں۔

حکومتی ایڈوائزی کے مطابق میلویئر کے ذریعے حساس معلومات چرا کر ڈیٹا بیس میں رکھی گئی ہیں، کریڈنشل سٹفنگ کے ذریعے خودکار حملے شروع ہونے کا خدشہ ہے، پاکستانی صارفین کو پاسورڈ منیجر کا استعمال کرنے کا مشورہ دیا گیا ہے۔

ایڈوائزی میں یہ بھی کہا گیا ہے کہ پاسورڈ کبھی ای میل یا غیر محفوظ فائل میں نہ رکھیں، صارفین اینٹی وائرس اور سکیورٹی سافٹ ویئر کو اپ ڈیٹ رکھیں، صارفین غیر معمولی لاگ ان کی سرگرمیوں پر نظر رکھیں، حکومت اور حساس اداروں کے نظام بھی خطرے میں پڑ سکتے ہیں۔

نیشنل کمپیوٹر ایمرجنسی رسپانس ٹیم کی ایڈوائزی میں مزید کہا گیا ہے کہ ادارے متاثرہ صارفین کو آگاہ کرنے کیلئے فوری طور پر اقدامات کریں، مسئلے کا واحد حل حفاظتی اقدامات، صارف آگاہی اور مؤثر نگرانی کو یقینی بنانا ہے، فوری اقدامات نہ کیے گئے تو قومی ڈیجیٹل نظام متاثر ہو سکتا ہے۔