اسلام آباد(نیشنل ٹائمز) روس کے دوسرے بڑے شہر سینٹ پیٹرز برگ پہنچنے پر ان کا استقبال مقامی حکام نے کیا۔شیخ جعفرمندوخیل کےساتھ بلوچستان کی تین جامعات کے وائس چانسلرز بھی سینٹ پیٹرزبرگ پہنچے ہیں جن میں لورالائی یونیورسٹی، لسبیلہ یونیورسٹی آف ایگری کلچر اور یونیورسٹی آف بلوچستان کے وائس چانسلرز شامل ہیں۔گورنربلوچستان کی سربراہی میں یہ وفد سینٹ پیٹرزبرگ میں روسی حکام سے سترہ اور اٹھارہ اپریل کو ملاقاتیں کرےگا۔ ذرائع کے مطابق پاکستانی وفد کے دورہ روس کا مقصد تعلیم اور سائنس کےشعبوں میں تعاون کو فروغ دینا ہے۔کراچی میں روسی قونصل جنرل آندرے فیدروف نے کہا کہ ہم تعلیمی شعبے میں پاکستانی شراکت داروں کی دلچسپی کاخیرمقدم کرتےہیں، سب سےقیمتی چیزانسانی اثاثہ ہے، اس میں سرمایہ کاری بڑھائی جانی چاہیے۔انہوں نے کہا کہ پاکستان کی 60 فیصد آبادی نوجوانوں پرمشتمل ہے، ان کی توانائیاں بےبہا ہیں، ہماری عوام کیلئے یہ انتہائی اہم ہےکہ نوجوانوں کی ان توانائیوں سے مستفید ہوں۔قونصل جنرل نے کہا کہ روسی جامعات میں اس وقت پچاس پاکستانی طلبہ کیلئے مفت تعلیم کا کوٹہ مختص ہے تاہم اس کوٹے میں اضافہ کیے جانے پر غور جاری ہے جس میں جلد پیشرفت متوقع ہے۔گورنر بلوچستان شیخ جعفر مندوخیل صوبے کی تین جامعات کے وائس چانسلرز کے ساتھ روس کا یہ دورہ ایسے وقت کررہے ہیں جب فلسطینیوں کے حق میں مظاہرہ کرنیوالے طالب علموں پر امریکا کی جامعات میں کارروائیاں کی جارہی ہیں اوربعض کا ویزا منسوخ کرکے انہیں ڈی پورٹ کیا جارہا ہے۔