اسلام آباد(نیشنل ٹائمز)ڈونلڈ ٹرمپ نے اپنے تازہ سوشل میڈیا پیغام میں لکھا کہ یوکرین کے صدر ولودومیر زیلنسکی ایک ایسے کامیڈین تھے جنہیں اپنے شعبے میں بھی محدود کامیابی حاصل ہوئی تھی۔ مگر انہوں نے امریکا کو ورغلا کر ایک ایسے جنگ میں ساڑھے تین سو ارب ڈالر جھونکنے پر آمادہ کر لیا جو یوکرین جیت بھی نہیں سکتا تھا۔ ٹرمپ نے کہا کہ یہ جنگ شروع ہونی ہی نہیں چاہیے تھی۔ یہ ایسی جنگ ہے جو وہ امریکا اور ٹرمپ کی مدد کے بغیر ختم بھی نہیں کر سکتے۔ امریکا نے اس جنگ میں یورپ سے دو سو ارب ڈالر زیادہ خرچ کیے ہیں اور امریکا کا پیسہ واپس بھی نہیں آنے والا۔ ٹرمپ نے کہا کہ سوتے رہنے والے جو بائیڈن نے یورپ سے برابری کا مطالبہ کیوں نہیں کیا کیوں کہ یہ جنگ ہم سے زیادہ یورپ کے لیے اہم تھی۔ ہمارے اور روس کے درمیان تو ایک پیارا سا بڑا سا سمندر بھی حائل ہے۔ امریکی صدر کا کہنا تھا کہ اوپر سے زیلنسکی یہ کہتے ہیں کہ امریکا نے یوکرین کو جو رقم بھیجی اس میں سے آدھی غائب ہو گئی۔ وہ اپنے ملک میں الیکشن بھی نہیں کرا رہے اور یوکرین کی رائے عامہ میں ان کی پسندیدگی بھی بہت کم رہ گئی ہے۔ ٹرمپ نے کہاکہ واحد کام جو زیلنسکی کو آتا تھا وہ تھا جو بائیڈن کو بانسری کی طرح بجانا۔ زیلنسکی کو اب تیزی سے کام کرنا ہو گا ورنہ ان کا ملک باقی نہیں بچے گا۔ اس دوران ہم یہ جنگ روکنے کے لیے روس کے ساتھ مل کر کامیاب مذاکرات کر رہے ہیں۔انہوں نے کہا کہ یہ کام صرف ٹرمپ کر سکتا تھا، بائیڈن نے اس کی کوشش بھی نہیں کی، یورپ بھی امن کے قیام میں ناکام رہا۔ مجھے یوکرین سے پیار ہے مگر زیلنسکی نے بہت ہولناک کام کیا ہے اور ان کا ملک تباہ ہو چکا ہے۔واضح رہے کہ یوکرینی صدر اداکار بھی رہ چکے ہیں۔
زیلنسکی کا اداکار سے یوکرین کا صدر بننے تک کا سفر
زیلنسکی کی پیدائش یوکرین کے شہر کریویرخ میں یہودی والدین کے ہاں ہوئی جنہوں نے دارالحکومت کیف کی نیشنل اکنامک یونیورسٹی سے قانون کی ڈگری حاصل کی لیکن انہیں اداکاری میں دلچسپی تھی اور انہوں نے اسی شعبے کا انتخاب کیا۔زیلنسکی نے 2003 میں ایک پروڈکشن کمپنی بنائی اور کامیڈی ٹیم کو ’کروٹل 95‘ کا نام دیا، 2010 تک ولادیمیر زیلنسکی کی ساری توجہ اپنے ٹی وی کیریئر پر ہی مرکوز رہی۔کون جانتا تھا کہ 2015 میں ریلیز ہونے والی ٹی وی سیریز ‘سرونٹ آف پیپل’ میں صدر کا کردار نبھانے والا اداکار ‘زیلنسکی’ چار سال بعد 2019 میں حقیقی طور پر یوکرین کا صدر بن جائے گا۔2019 میں ہونے والے صدارتی انتخابات میں ولودومیر زیلنسکی نے اس وقت کے صدر پیٹرو پوروشینکو کو ایک واضح مارجن سے شکست دی اور ملک کے حقیقی صدر بنے۔