اسلام آباد(نیشنل ٹائمز)غیر ملکی میڈیا کے مطابق امریکی فضائیہ کے زیر استعمال ایف 35 لڑاکا طیارہ الاسکا میں امریکی ائیر فورس بیس پر گر کر تباہ ہوا تاہم ایک نشست والے لڑاکا طیارے کا پائلٹ طیارے کے تباہ ہونے سے پہلے بچ نکلنے میں کامیاب رہا۔امریکی لڑاکا طیارے کے تباہ ہونے کی ویڈیو بھی منظر عام پر آئی ہے جس میں طیارے کو قلابازیاں کھاتے ہوئے نیچے کی طرف آتے اور زمین سے ٹکرا کر تباہ ہوتے دیکھا جا سکتا ہے۔سوشل میڈیا پر وائرل ویڈیوز میں طیارے کے تباہ ہونے کے بعد آگ کے بادل بنتے بھی دیکھا جا سکتا ہے۔امریکی فضائیہ کے حکام نے طیارے کے حادثے کو بڑی تباہی قرار دیتے ہوئے کہا کہ ہماری اولین ترجیح ہمارے جوان ہیں اور ہم اپنے اہلکاروں کی سیفٹی کو ہر صورت یقینی بنائیں گے۔طیارے کی تحقیقات کے حوالے سے امریکی فضائیہ کے حکام کا کہنا تھا امریکی فضائیہ طیارہ حادثے کی تحقیقات کو ہر صورت یقینی بنائے گی تاکہ آئندہ اس قسم کے حادثات کو کم سے کم کیا جا سکے۔خیال رہے کہ ایف 35 امریکا کا جدید ترین لڑاکا طیارہ ہے جسے ایف 16 فائٹنگ فیلکنز اور اے 10 تھنڈر بولٹ ٹو کی جگہ امریکی فوج کے حوالے کیا گیا تھا۔ائیر اینڈ اسپیسس فورسز میگزین کی رپورٹ کے مطابق جدید ترین لڑاکا ایف 35 طیارے کی مالیت 81 ملین ڈالر ہے اور اس وقت الاسکا کی ائیر فورس بیس پر 54 ایف 54 طیارے کھڑے ہیں۔