اسلام آباد (نیشنل ٹائمز) وفاقی دارالحکومت اسلام آباد کی ضلعی انتظامیہ نے پاکستان تحریک انصاف کو 8 ستمبر کوجلسہ کرنے کی اجازت دے دی۔ تفصیلات کے مطابق اس حوالے سے جاری ڈپٹی کمشنر اسلام آباد کی جانب سے نوٹی فکیشن بھی جاری کردیا گیا، انتظامیہ نے 8 ستمبر کو جلسے کا این او سی پی ٹی آئی کی قیادت کو دے دیا، 8 ستمبر جلسے کا این او سی پی ٹی آئی اسلام آباد کے صدر عامر مغل کے نام جاری کیا گیا۔
معلوم ہوا ہے کہ انتظامیہ کی جانب سے 40 ہدایات کے ساتھ نوٹی فکیشن جاری کیا گیا، جس میں انتظامیہ کا کہنا ہے کہ 8 ستمبر کو پی ٹی آئی کے جلسے کو انتظامیہ سکیورٹی فراہم کرے گی، جلسہ کرنے والوں کے بنیادی حقوق متاثر نہیں ہوں گے، لوگ شام 4 بجے اکھٹے ہوں گے اور 7 بجے ختم کرنا ہوگا، جلسہ ختم کرنے کے بعد کارکنان کو منتشر کیا جائے گا، 8 ستمبر کو کارکنوں کو جلسہ گاہ میں دھرنا دینے کی اجازت نہیں ہوگی۔

قبل ازیں اسلام آباد میں پی ٹی آئی کے آج ہونے والے جلسے کا این اوسی منسوخ کردیا گیا تھا، ضلعی انتظامیہ کا کہنا تھا کہ ’مذہبی جماعتوں نےاحتجاج کی کال دے رکھی ہے، ایسی صورتحال میں جلسے کی اجازت نہیں دی جاسکتی‘،اس کے بعد پاکستان تحریک انصاف نے آج ترنول میں شیڈول جلسہ ملتوی کردیا، پی ٹی آئی کی طرف سے جاری اعلامیے میں کہا گیا کہ اطلاعات ہیں کہ حکومت اس جلسے کی آڑ میں انتشار پھیلانے کی سازش کر رہی ہے، اس لیے پارٹی قائد عمران خان کی جیل سے جاری ہدایات کے تحت آج کے جلسے کی تاریخ تبدیل کی جا رہی ہے، تاہم عمران خان کی جانب سے تمام کارکنان کو ہدایت کی گئی ہے کہ جلسے کی تیاری جاری رکھیں، عوام میں نکلیں اور تحریک چلائیں، جلسے کی نئی تاریخ کا اعلان جلد کیا جائے گا۔
بتایا گیا کہ قومی اسمبلی میں اپوزیشن لیڈر عمر ایوب، پی ٹی آئی رہنماء اعظم سواتی اور چیئرمین تحریک انصاف بیرسٹر گوہر نے پارٹی کے بانی چیئرمین عمران خان سے اڈیالہ جیل میں ہنگامی ملاقات کی جس میں آج کا جلسہ ملتوی کرنے کا فیصلہ ہوا، اس ملاقات کے بعد عمر ایوب، اعظم سواتی اور بیرسٹر گوہر نے میڈیا سے گفتگو میں بتایا کہ عمران خان کی ہدایت پراسلام آباد جلسے کی تاریخ تبدیل کی جا رہی ہے، جلسے کی نئی تاریخ کا اعلان جلد کیا جائے گا، جلسہ 8 یا 9 ستمبر کو اسلام آباد میں ہوسکتا ہے۔