اسلام آباد (نیشنل ٹائمز) اسلام آباد چیمبر آف کامرس اینڈ انڈسٹری (آئی سی سی آئی)نے 13سے 15اگست تک اسکردو میں دوسری آئی سی سی آئی ٹورازم سمٹ کی کامیابی سے میزبانی کی، جس میں 10دوست ممالک کے سفیروں اور سفارت کاروںکے علاوہ کاروباری رہنمائوں اور میڈیا کے نمائندوں نے بڑی تعداد میں شرکت کی۔ جاری اعلامیہ میں کہا گیا ہے کہ موجودہ صدر احسن ظفر بختاوری کی دور اندیش قیادت میں آئی سی سی آئی پاکستان کے سافٹ امیج کو اجاگر کرنے اور دنیا بھر سے سیاحوں کو راغب کرنے میں کلیدی کردار ادا کر رہا ہے۔اس موقع پر، آئی سی سی آئی نے پاکستان اور ان کے متعلقہ ممالک کے درمیان تجارتی تعلقات اور سیاحت کے فروغ میں ان کی نمایاں خدمات کا اعتراف کرتے ہوئے ایک پروقار تقریب میں سفیروں اور سفارت کاروں کو اعزازات سے نوازا۔ ایوارڈ حاصل کرنے والوں میں شامل ہیں۔یورپی یونین کی سفیر ڈاکٹر رینا کیونکا، ملائیشیا کے ہائی کمیشن محمد اظہر بن مزلان، مصر کے سفیر ڈاکٹر ایہاب محمد عبد الحمید حسن، آذربائیجان کے سفیر خضر فرہادوف، قازقستان کے سفیر یرژان کستافین، ایم مطہر فتح اللہ یمن کے سفیر وونا ہان، میانمار کے سفیر محمد بنجمہ، ڈپٹی ہیڈ آف مشن لیبیا، ٹیاگو میگوئل روڈریگس مونٹیریو، سفارت خانہ پرتگال، غضنفر محمود، سفارت خانہ ترکی،آئی سی سی آئی نے ساجد علی سدپارہ، ایک پاکستانی کوہ پیما، جنہوں نے انیس سال کی عمر میں دنیا کی دوسری بلند ترین چوٹی کے ۔ٹو کو سر کیا اور گلگت بلتستان کے وزیر برائے منصوبہ بندی و ترقی راجہ ناصر علی خان کو ان کی غیر معمولی خدمات کو سراہتے ہوئے شیلڈز بھی پیش کیں۔ آئی سی سی آئی کے صدر احسن ظفر بختاوری نے اعزازات حاصل کرنے پر معزز سفیروں کو دل کی گہرائیوں سے مبارکباد پیش کی اور کہا کہ یہ اعزاز اپنے اپنے ممالک اور پاکستان کے درمیان سیاحتی روابط کو فروغ دینے میں ان کی گراں قدر خدمات کا منہ بولتا ثبوت ہے۔ انہوں نے اس امید کا اظہار کیا کہ ایوارڈ یافتہ افرادممالک کے درمیان عوام سے عوام کے رابطوں کو مضبوط بنانے، ثقافتی تفہیم کو فروغ دینے اور سیاحتی تعاون کو بڑھانے میں اہم کردار ادا کرتے رہیں گے۔ انہوں نے حکومت پاکستان سے محمد علی سدپارہ کے لیے ان کی خدمات کے اعتراف میں سول ایوارڈ کا اعلان کرنے کابھی مطالبہ کیا۔