لاہور(نیشنل ٹائمز) بانی پی ٹی آئی عمران خان کیخلاف درج سانحہ نو مئی کے مقدمات کی تفتیش کیلئے نئی جوائنٹ انویسٹی گیشن ٹیم بنانے کا فیصلہ ،پولیس کی جانب سے محکمہ داخلہ پنجاب کو سفارشات بھجوا دی گئیں، جوائنٹ انو یسٹی گیشن ٹیم میں شامل 3 ایس پیز کو تبدیل کیا گیا ہے،جوائنٹ انویسٹی گیشن ٹیم بانی پی ٹی آئی کیخلاف 12 مقدمات کی تفتیش کر رہی ہے۔
پولیس ذرائع کے مطابق جوائنٹ انو یسٹی گیشن ٹیم میں 2 نئے ممبران بھی شامل کئے جائیں گے۔ہائیکورٹ میں اس حوالے سے درخواست بھی دائرکی جاچکی ہے۔یہ بھی بتایا گیا ہے کہ ایس پی زنیر احمد چیمہ ایس پی ہیڈ کوارٹرز لاہور تعینات ہیں جبکہ ایس پی سی آر او رضا تنویر ضلع گوجرانوالہ میں تعینات ہوگئے اورایس پی انویسٹی گیشن کینٹ لاہور ارسلان زاہد کو ملتان تعینات کیا گیاہے۔

یاد رہے کہ بانی پی ٹی آئی عمران خان کے خلاف 9 کے 12 مقدمات کی تفتیش کیلئے لاہور پولیس کی 12 رکنی تفتیشی ٹیم تشکیل دی گئی تھی۔لاہور پولیس کی ٹیم 12 انسپکٹرز پر مشتمل ہے جس کے سربراہ ڈی ایس پی جاوید آصف ہیں۔لاہور پولیس کی 12 رکنی ٹیم قانونی ضابطے مکمل کرکے اڈیالہ جیل گئی تھی اور عمران خان سے مقدمات کی تفتیش کی تھی۔عمران خان کی لاہور میں درج 9 مئی کے مقدمات میں گرفتاری ڈال دی گئی تھی۔
تفتیشی ٹیم نے بانی پی ٹی آئی عمران خان سے 9 اور 10 مئی کے واقعات پر سوالات کئے گئے تھے۔لاہور پولیس ٹیم نے جناح ہاوس، عسکری ٹاور اور شادمان تھانہ حملہ کیس پر سوالات کئے تھے۔ تفتیش میں ڈیجیٹل شواہد اور گرفتار ملزمان کے بیانات کی روشنی میں پوچھ گچھ کی گئی تھی۔بعدازاںاڈیالہ جیل میں بانی پی ٹی آئی) نے 9 مئی کے 12 مقدمات میں شامل تفتیش ہونے سے انکار کردیا تھا جس کے بعد لاہور پولیس کی تفتیشی ٹیم واپس روانہ ہوگئی تھی۔
12 رکنی ٹیم نے بانی پی ٹی آئی سے 9 مئی کے 12 مقدمات کی تفتیش کرنا تھی لیکن وہ لاہور پولیس کی تفتیشی ٹیم کے سامنے شامل تفتیش نہیں ہوئے تھے۔بانی پی ٹی آئی عمران خان کو شامل تفتیش ہونے کےلئے متعدد پیغامات بھجوائے گئے تھے۔ بانی پی ٹی آئی نے وکلاءکی موجودگی کے بغیر شامل تفتیش ہونے سے انکار کر دیاتھا۔بانی پی ٹی آئی عمران خان کے خلاف مجموعی طور پر 16 مقدمات درج ہیں،4 مقدمات میں بانی پی ٹی آئی نے ضمانت کروا رکھی تھی۔