اسلام آباد (نیشنل ٹائمز) پاکستان تحریک انصاف کے رحیم یار خان سے رکن قومی اسمبلی ممتاز مصطفی انتقال کرگئے۔ تفصیلات کے مطابق تحریک انصاف کے رکن قومی اسمبلی ممتاز مصطفی ہارٹ اٹیک کی وجہ سے خالق حقیقی سے جا ملے، ممتاز مصطفیٰ پارلیمنٹ لاجز میں مقیم تھے، ترجمان قومی اسمبلی نے ممتاز مصطفیٰ کے انتقال کی تصدیق کرتے ہوئے سپیکر قومی اسمبلی سردار ایاز صادق کو بھی اس سے آگاہ کردیا، رکن قومی اسمبلی کی وفات کے باعث آج ایوان زیریں کا اجلاس بغیر کارروائی کے ملتوی ہو جائے گا جب کہ متوفی ایم این اے کی میت اسلام آباد سے رحیم یار خان منقتل کی جائے گی جہاں ان کی نماز جنازہ اور تدفین ان کے آبائی علاقہ میں ہوگی۔

پاکستان تحریک انصاف کی جانب سے بھی رکن قومی اسمبلی کے انتقال کی تصدیق کی گئی، اس حوالے سے جاری بیان میں پارٹی ترجمان نے کہا کہ رحیم یار خان این اے 171 سے تحریک انصاف کے ایم این اے ایڈوکیٹ ممتاز مصطفیٰ رضائے الہٰی سے وفات پاگئے ہیں، اللہ تعالیٰ مرحوم کو جنت الفردوس میں اعلیٰ مقام عطا فرمائے اور انکے اہل خانہ کو صبر جمیل عطا فرمائے۔