اسلام آباد (نیشنل ٹائمز) پاکستان تحریک انصاف کے قائم مقام سیکرٹری اطلاعات شعیب شاہین اور رہنماء پی ٹی آئی نعیم حیدر پنجوتھا نے بھی شیر افضل مروت کو پارٹی سے نکالنے کی تصدیق کر دی،اس حوالے سے شعیب شاہین کا کہنا ہے کہ شیر افضل مروت کو بانی پی ٹی آئی عمران خان کی ہدایات پر پارٹی سے نکالاگیا ہے ۔اسی طرح پاکستان تحریک انصاف کے رہنماءاور بانی پی ٹی آئی عمران خان کے وکیل نعیم حیدر پنجوتھا نے بھی شیر افضل مروت کی پارٹی رکنیت کی منسوخی کے نوٹیفکیشن کو درست قرار دیا ہے۔
ان کا کہنا ہے کہ شیر افضل مروت کو پارٹی سے نکالنے کا نوٹیفکیشن بالکل درست ہے۔جبکہ اس سے قبل پی ٹی آئی رہنماءبیرسٹر گوہر نے کہاتھا کہ شیر افضل مروت کی پارٹی رکنیت منسوخی کاعلم نہیں۔

بانی پی ٹی آئی سے ملاقات کروں گا اور عمران خان کے سامنے ساری صورتحال رکھوں گا۔بیرسٹر گوہر علی نے یہ بھی کہا کہ مجھے نہیں معلوم اس وقت کون ہدایات جاری کر رہا ہے اور کون فیصلے لے رہا ہے۔

میرے علم میں یہ بات نہیں لائی گئی کہ بانی پی ٹی آئی نے اس قسم کی کوئی ہدایات جاری کی ہیں۔خیال رہے کہ پی ٹی آئی نے پارٹی کے سینئر نائب صدرشیر افضل مروت کی بنیادی پارٹی رکنیت ختم کرتے ہوئے ان سے قومی اسمبلی کی رکنیت سے بھی مستعفی ہونے کا مطالبہ کیا تھا۔پی ٹی آئی کے ایڈیشنل جنرل سیکرٹری فردوس شمیم نقوی نے نوٹیفکیشن جاری کرتے ہوئے کہا تھا کہ پی ٹی آئی نے سنگین خلاف ورزیوں پر شیر افضل مروت کی بنیادی پارٹی رکنیت ختم کرنے کا فیصلہ کیا ہے۔
رکنیت ختم کرنےکا یہ نوٹیفکیشن پی ٹی آئی نے آفیشل اکاو¿نٹ سے بھی شیئر کیا جبکہ کور کمیٹی ممبران نے بھی شیر افضل مروت کی رکنیت منسوخی کی تصدیق کی تھی۔ کور کمیٹی اجلاس میں یہ فیصلہ ہوا تھا کہ شیر افضل مروت کو نکالا جائے۔پی ٹی آئی کی جانب سے جاری کردہ اعلامیے میں مزید کہا گیا ہے کہ نوٹس پیریڈ کے دوران انضباطی کمیٹی نے محسوس کیا کہ شیر افضل مروت کو پارٹی ضوابط کا کوئی خیال نہیں ہے۔ شیرافضل مروت خود کو پارٹی قوانین سے بالاتر سمجھتے ہیں۔جس سے پارٹی کی تصویر اور پارٹی کا بیانیہ بری طرح مسخ ہوا ہے۔