راولپنڈی(نیشنل ٹائمز) قومی اسمبلی میں اپوزیشن لیڈر عمر ایوب نے کہا ہے کہ بانی پاکستان تحریک انصاف (پی ٹی آئی)نے واضح کیا ہے کہ فوج عوام میں سے ہے، مسلم لیگ ن اور پیپلز پارٹی فوج اور پی ٹی آئی کے درمیان دوریاں پیدا کر رہی ہیں۔اڈیالہ جیل کے باہر میڈیا سے گفتگو کرتے ہوئے عمر ایوب نے کہا کہ بانی پی ٹی آئی نے 5 اگست کے صوابی کے جلسے کے حوالے سے پیغام دیا ہے، علی امین گنڈاپور صوابی جلسہ کے میزبان ہوں گے۔اپوزیشن لیڈر نے کہا کہ بانی پی ٹی آئی کی رہائی کیلئے ہم راکٹ لانچرز لے کر اڈیالہ جیل پر حملہ نہیں کر سکتے، چیف جسٹس اسلام آباد ہائیکورٹ کو بانی پی ٹی آئی کے کیسز سے الگ ہونا چاہیے، بشری بی بی کی رہائی ہونی تھی لیکن نیب نے نہیں ہونے دی، جسٹس سسٹم کو چاہیے بانی پی ٹی آئی کے ساتھ انصاف کرے۔اپوزیشن لیڈر نے کہا کہ واضح بتانا چاہتا ہوں پیپلز پارٹی اور ن لیگ نے مہنگے داموں پاور پلانٹس لگائے ہیں، آصف زرداری نے ایوان صدر کا 88 کروڑ روپے بجٹ بڑھایا ہے، عوام کیلیے ٹیکسز اور اپنے لیے ان کے مزے ہیں۔انہوں نے کہا کہ جب تک بندیال چیف جسٹس تھے نواز شریف ملک میں نہیں آئے، وہ اس وقت آئے جب فائز عیسی چیف جسٹس بنے، چیف جسٹس فائز عیسی کی اہلیہ نے بانی پی ٹی آئی کے خلاف آرٹیکل لکھے، جوڈیشل عمل میں بشری بی بی کا توشہ خانہ میں کوئی لین دین نہیں۔ عمر ایوب نے کہا کہ رف حسن کو سی ٹی ڈی نے حراست میں رکھا ہے، خدا کا خوف کرو رف حسن کو کیوں سی ٹی ڈی کے پاس رکھا ہے، میرے خلاف خود وارنٹ گرفتاری ہے، حاجی امتیاز کے پروڈکشن آرڈر کیلیے اسپیکر کے پاس گئے، اگلے ہی دن انٹیلی جنس ایجنسی کے لوگ حاجی امتیاز کو اینٹی کرپشن سے لے گئے، رف حسن ضعیف العمر شخص ہیں ان کو سی ٹی ڈی کے حوالے کیا گیا، اتنے بھی ڈفر نہ بنو، بنو لیکن کم بنو، ہم سب کو کسی نہ کسی طرح کیسز میں الجھانے کی کوشش کی جا رہی ہے۔پی ٹی آئی رہنما نے کہا کہ ایران کی سر زمین پر حماس کے رہنما کو شہید کیا گیا، ایسے واقعات سے مسلمانوں کے دلوں میں غم و غصہ بڑھتا ہے، بانی پی ٹی آئی نے اسماعیل ہنیہ کے قتل کی مذمت کی ہے۔