اسلام آباد (نیشنل ٹائمز) عمران سے ملاقات کیلئے آئے برطانوی صحافی کا ویزا منسوخ ، چارلز گلاس نے عدالتی اجازت کے باوجود بانی تحریک انصاف سے ملاقات نہ کروانے پر وزیر داخلہ سے رابطہ کیا تھا۔ تفصیلات کے مطابق اڈیالہ جیل میں قید بانی تحریک انصاف سے ملاقات کرنے اور ان کا انٹریو کرنے کیلئے آنے والے برطانوی صحافی کو وفاقی وزارت داخلہ نے پاکستان سے واپس بھیج دیا۔

میڈیا رپورٹس کے مطابق امریکی نژاد برطانوی صحافی چارلز گلاس گزشتہ چند روز سے پاکستان میں موجود تھے، انہوں نے اڈیالہ جیل میں بانی تحریک انصاف عمران خان سے ملاقات کی کوشش کی تھی، تاہم جیل انتظامیہ نے ان کی سابق وزیر اعظم سے ملاقات نہ ہونے دی۔ اس کے بعد چارلز گلاس نے وزیر داخلہ کو بذریعہ ای میل بتایا تھا کہ انہیں عدالتی اجازت کے باوجود بانی تحریک انصاف عمران خان سے ملاقات نہ کرنے دی گئی۔ تاہم ان کی شکایت پر وزارت داخلہ نے ان کا ویزہ منسوخ کر کے انہیں پاکستان سے واپس بھیج دیا۔