ڈھاکا (نیشنل ٹائمز) بنگلادیش کرکٹ بورڈ نے کہا ہے کہ دارالحکومت ڈھاکا میں جاری پرتشدد مظاہروں کے باوجود رواں برس ویمنز ٹی20 ورلڈکپ کی میزبانی کیلئے تیار ہیں۔ معروف کرکٹ ویب سائٹ کے مطابق بنگلادیش میں سیاسی بدامنی کے انٹرنیشنل کرکٹ کونسل (آئی سی سی)نے رواں برس اکتوبر میں شیڈول ٹی20 ورلڈکپ کی میزبانی پر گہری نظر رکھی ہوئی ہے۔ 3 سے 20 اکتوبر تک جاری رہنے والے ایونٹ میں 10 ٹیمیں شرکت کریں گی جبکہ میچز ڈھاکا کے شیر بنگلہ نیشنل کرکٹ اسٹیڈیم اور سلہٹ میں کھیلے جائیں گے۔ دونوں اسٹیڈیمز 18 روز میں 23 میچز کی میزبانی کریں گے۔ دوسری جانب بنگلادیش کرکٹ بورڈ کے سی ای او نظام الدین چودھری نے ویمنز ورلڈکپ سے متعلق ہونے والی قیاس آرائیوں پر کہا ہے کہ ہم میگا ایونٹ کی میزبانی کریں گے اور اس چیز کو مدنظر رکھتے ہوئے اقدامات اٹھارہے ہیں۔ بی سی بی کے صدر نظم الحسن اور چیف ایگزیکٹیو کولمبو میں آئی سی سی کے اجلاس میں شرکت کے بعد جمعہ کو ڈھاکہ واپس پہنچے ہیں۔ قبل ازیں رپورٹس سامنے آئیں تھی کہ ڈھاکا میں جاری حالیہ بدامنی کے باعث بنگلہ دیش میں ویمنز ٹوئنٹی20 ورلڈ کپ کا انعقاد خطرے میں پڑ گیا ہے، طلبا اور پولیس کے درمیان جھڑپوں میں اب تک 50 افراد کے ہلاک ہونے کی اطلاعات ہیں جبکہ زخمی افراد کی تعداد سینکڑوں میں ہے۔ آئی سی سی بورڈ کے ایک رکن نے نام ظاہر نہ کرنے کی شرط پر بتایا کہ ہمارے پاس دنیا بھر میں سیکیورٹی کا خود مختار مانیٹرنگ سسٹم موجود ہے، اسی کے ذریعے ہم بنگلہ دیش کی حالیہ صورتحال کو جانچ رہے ہیں۔