گھوٹکی (نیشنل ٹائمز) گھوٹکی میں پولیس چوکی پر ڈاکوں کے حملے میں 2 پولیس اہلکار شہید ہوگئے۔ پولیس کے مطابق سندھ کے علاقے گھوٹکی کچے کے تھانہ آندل سندرانی کے حفاظتی بند پر قائم پولیس چوکی پر ایک درجن سے زائد ڈاکوں نے رات گئے جدید اسلحے سے حملہ کیا جس کے نتیجے میں فائرنگ سے 2 اہلکار شہید ہوگئے۔ پولیس کا کہنا ہے کہ شہید اہلکاروں میں ظہیر تھہیم اور عبدالقادر مہر شامل ہیں۔ ایس ایس پی گھوٹکی سمیر نور چنہ کے مطابق پولیس نے بھرپور جوابی کارروائی کی جس میں ڈاکوں کے زخمی ہونے کی بھی اطلاعات ہیں، پولیس کی بھاری نفری کو طلب کر لیا گیا جبکہ زخمی ڈاکوں کا تعاقب جاری ہے۔ دوسری جانب ڈاکوں کے حملے میں شہید اہلکاروں کی نماز جنازہ پولیس لائن میں ادا کر دی گئی، نمازجنازہ میں پولیس کے افسران، اہلکاروں اور شہریوں کی کثیرتعداد نے شرکت کی۔ ایس ایس پی گھوٹکی نے کہا کہ ڈاکو راحب شر کے کئی ٹھکانے تباہ کئے ہیں، ڈاکوں کو جلد منطقی انجام تک پہنچائیں گے۔
گھوٹکی، پولیس چوکی پر ڈاکووں کے حملے میں 2 اہلکار شہید
