اسلام آباد(پی این آئی)سابق وفاقی وزیر فواد چوہدری نے جماعت اسلامی اور جے یو آئی کو عمران خان سے اتحاد کرنے کا مشورہ دیدیا، پی ٹی آئی کو اس وقت عوامی قوت دکھانے کیلئے ان جماعتوں کی تنظیم کی ضرورت ہے،کامیاب عوامی شو پر جماعت اسلامی کو مبارکباد پیش کرتا ہوں۔اپنے ایک بیان میں سابق وفاقی وزیر کا مزید کہنا تھا کہ جماعت اسلامی، جے یو آئی کو کامیاب سیاست کیلئے عمران خان سے اتحاد کرنا پڑے گا۔
ان جماعتوں کا اتحاد سب کے مفاد میں ہے۔ اسد قیصر اور محمودخان اچکزئی ان معاملات پر تیزی دکھائیں تاکہ ملک سے فراڈ کا خاتمہ ہو اور عوامی حکومت قائم کی جا سکے۔جماعت اسلامی، جے یوآئی اور جی ڈی اے اگر کامیاب سیاست کرنا چاہتی ہیں تو انہیں بانی پی ٹی آئی سے اتحاد کرنا پڑے گا ورنہ ان کی عشروں سے جاری بے نتیجہ سیاست ہی جاری رہے گی۔

جعلی حکومت کے خاتمے کیلئے ان ساری جماعتوں کو مل بیٹھنا ہوگا۔

یاد رہے کہ مہنگائی اورمہنگے بجلی بلوں کے خلاف جماعت اسلامی کا دھرنا دوسرے روز بھی جاری ہے۔راولپنڈی کے لیاقت باغ میں جاری جماعت اسلامی کے دھرنے میں شرکاءبڑی تعداد میں موجود ہیں۔جماعت اسلامی کے کارکنان نے لیاقت باغ مری روڈپرخیمے لگالئے ہیں جس کے باعث ایک ٹریک ٹریفک کیلئے بند ہے۔دوسری جانب جماعت اسلامی نے حکومت کی مذاکرات کیلئے 3 رکنی کمیٹی کی پیشکش قبول کر لی ہے۔
جماعت اسلامی کی قیادت پر مشتمل کمیٹی حکومت سے مذاکرات کرے گی۔حکومت نے جماعت اسلامی سے مذاکرات کیلئے 3 رکنی کمیٹی تشکیل دیدی ہے۔ کمیٹی میں وفاقی وزیر اطلاعات و نشریات عطاءاللہ تارڑ، طارق فضل چودھری اور امیر مقام شامل ہیں۔میٹرو بس سروس آج دوسرے روز بھی بند ہے جس سے شہریوں کو شدید مشکلات کا سامنا ہے۔میٹرو بس انتظامیہ نے گزشتہ روز صدر سے فیض آباد تک سروس معطل کی تھی۔ میٹرو بس سروس معطل ہونے سے راولپنڈی سے اسلام آباد جانے والے مسافروں کو پریشانی کا سامنا ہے۔