لاہور(نیشنل ٹائمز) وزیر اطلاعات پنجاب عظمی بخاری نے کہا ہے کہ جو صحافت کی شکل میں سیاست کر رہے ہیں انکا ایجنڈا کوئی اور ہے۔عظمی بخاری نے پی ایف یو جے کے سالانہ اجلاس سے خطاب کرتے ہوئے کہا کہ پوری دنیا میں اظہار رائے کا ایک طریقہ کار موجود ہے، پیکا ایکٹ کے خلاف پہلے بھی تھے اور اب بھی ہیں۔انہوں نے کہا کہ ہمارے سے ذیادہ ترقی یافتہ ممالک میں بھی ایسا اظہار رائے نہیں ہے،جیسا یہاں مانگا جا رہا ہے، جو صحافت کی شکل میں سیاست کر رہے ہیں انکا ایجنڈا کوئی اور ہے۔ان کا کہنا تھا کہ جو الزام لگائے اسکو الزام بھی ثابت کرنا ہو گا، ہتک عزت قانون کورٹ میں چیلنج ہو چکا ہے، ہم نے اپنی عقل اور سوچ کے مطابق ہتک عزت قانون بنایا ہے۔وزیر اطلاعات پنجاب نے کہا کہ ہتک عزت قانون پر کورٹ جو بھی فیصلہ کرے گی حکومت اور میڈیا کو قبول کرنا ہو گا۔ عظمی بخاری نے کہا کہ کل ایک ملک میں وزیراعظم کے قد پر بات کرنے پر صحافی کو جرمانہ ہوا، ہتک عزت قانون پر اب کورٹ کے فیصلہ کا انتظار کرتے ہیں۔