اسلا م آباد (نیشنل ٹائمز) پاکستان اور آذربائیجان نے توانائی، تجارت، روابط، دفاع اور عوامی روابط کے شعبوں میں تعاون مزید وسیع کرنے کے عزم کا اظہار کیا ہے۔صدر مملکت آصف علی زرداری سے آذربائیجان کے صدر الہام علیوف کی ایوانِ صدر میں ملاقات ہوئی جس میں پاکستان اور آذربائیجان نے باہمی دلچسپی کے شعبوں میں سود مند تعاون بڑھانے کے عزم کا اعادہ کیا۔علاوہ ازیں توانائی، تجارت، روابط، دفاع اور عوامی روابط کے شعبوں میں پاکستان اور آذربائیجان نے تعاون مزید وسیع کرنے کے عزم کا بھی اظہار کیا۔صدر مملکت آصف علی زرداری نے کہا کہ دونوں ممالک کے درمیان باہمی دلچسپی کے مختلف شعبوں میں تعلقات مزید بہتر بنانے کی وسیع گنجائش موجود ہے۔آصف زرداری کا کہنا تھا کہ دوطرفہ تعلقات مستحکم کرنے کے لئے پاکستان اور آذربائیجان کے عوام اور تاجروں کے درمیان باقاعدہ روابط بڑھانے کی ضرورت ہے۔ صدر مملکت نے کہا کہ وسطی ایشیائی ممالک اور آذربائیجان گوادر بندرگاہ کو علاقائی تجارت، روابط، سیاحت اور خطے میں مشترکہ اقتصادی خوشحالی لانے کے لیے استفادہ کرسکتے ہیں۔صدر مملکت نے پاکستان اور آذربائیجان کے درمیان مفاہمت کی یادداشتوں پر دستخط کا خیرمقدم کیا۔اس حوالے سے آصف زرداری کا کہناتھا کہ مفاہمت کی یادداشتوں سے تجارت، سیاحت، کان کنی، معدنیات، سائنس و ٹیکنالوجی، ثقافت، قانون اور انصاف کے شعبوں میں دوطرفہ تعاون کو نئی تحریک ملے گی۔انہوں نے مزید کہا کہ مشرقی ممالک میں دنیا کو خوشحالی کی طرف لے جانے کی صلاحیت موجود ہے جب کہ پاکستان وسطی ایشیائی ممالک اور آذربائیجان کے ساتھ پائیدار اور نتیجہ خیز روابط قائم کرنا چاہتا ہے۔آذربائیجان کے صدر الہام علیوف نے کہا کہ پاکستان اور آذربائیجان کے درمیان اچھے عوامی روابط ہیں، دونوں ممالک کو اقتصادی تعلقات بڑھانے کے لئے کاروباری تعلقات کو فروغ دینا ہوگا۔ الہام علیوف نے کہا پاکستان اور آذربائیجان قابل ِتجدید توانائی کے شعبے میں مل کر کام کرنے کے امکانات تلاش کرسکتے ہیں۔ بعد ازاں صدر مملکت نے ایوان صدر میں صدر الہام علیوف اور ان کے وفد کے اعزاز میں ظہرانہ دیا جب کہ ظہرانے میں وزیراعظم محمد شہباز شریف، وفاقی وزرا، ارکان پارلیمنٹ، سفارتکاروں اور صحافیوں نے بھی شرکت کی۔