اسلام آباد(نیشنل ٹائمز) سکیورٹی خدشات کے پیش نظر وفاقی دارالحکومت کی ضلعی انتظامیہ نے تحریک انصاف کو آج (ہفتہ کو ) اسلام آباد میں جلسے کی اجازت منسوخ کردی ۔ اسلام آباد انتظامیہ کی جانب سے تحریک انصاف کو پشاور روڈ ترنول کے مقام پر جلسے کی اجازت دی گئی تھی تاہم اب انتظامیہ نے سکیورٹی خدشات اور دہشت گردی کے سبب اجازت نامہ منسوخ کردیا ہے۔چیف کمشنر اسلام آباد کی زیر صدرات محرم الحرام اور دیگر سکیورٹی خدشات کی صورت حال کا جائزہ لینے کے لئے اعلیٰ سطح اجلاس منعقد ہواجس میں سکیورٹی اداروں کے افسران نے بھی شرکت کی جبکہ سیاسی جماعت کا کوئی بھی نمائندہ دعوت کے باوجود اجلاس میں شریک نہیں ہوا۔اجلاس میں جلسے سے متعلق درخواستوں کو بھی جائزہ لیا گیا اور ڈپٹی کمشنر کی طرف سے دی جانے والی اجازت کا موجودہ سکیورٹی خدشات کے تناظر میں از سر نو جائزہ لیا گیا۔چیف کمشنر اسلام آباد نے درخواستوں، سکیورٹی کی موجودہ صورت حال، محرم الحرام کی آمد اور سکیورٹی خدشات، قانون نافذ کرنے والے اداروں کی سفارشات کی روشنی میں جلسے کا این او سی معطل کرنے کا فیصلہ کیا۔اسلام آباد انتظامیہ کی جانب سے جاری اعلامیے میں بتایا گیا کہ جلسے کے این او سی کی معطلی کا فیصلہ شہریوں کے جان و مال کے تحفظ کے لئے کیا گیا ہے، اسلام اباد میں امن عامہ کو برقرار رکھنا اور شہریوں کے جان و مال کا تحفظ ہماری ترجیح ہے۔۔