اسلام آباد (نیشنل ٹائمز)جے یو آئی (ف)کے ترجمان حافظ حمد اللہ نے کہاہے کہ مذاکرات کیلئے آنے والی پی ٹی آئی کی کمیٹی کو ویلکم کریں گے،ہمارا فیصلہ تحریک چلانے کا ہے وہ کامیاب ہوتی ہے یا نہیں یہ بعد کی بات ہے،جے یو آئی کے پاس سٹریٹ پاور بھی ہے اور اسپیچ پاور بھی ہے۔ ایک نجی ٹی وی سے گفتگو کرتے ہوئے حافظ حمد اللہ نے کہا کہ رٹی کی مجلس شوری کے دوروزہ اجلاس میں ملکی اور عالمی صورتحال پر تبادلہ خیال کیا گیا،ہمیں باضابطہ طورپر پی ٹی آئی کی جانب سے کمیٹی کے ممبران کے بارے میں کوئی اطلاع نہیں،ہم مذاکرات کیلئے آنے والی پی ٹی آئی کی کمیٹی کا خیرمقدم کریں گے۔انہوں نے کہا کہ مجلس شوریٰ میں جے یو آئی کا تنہا تحریک چلانے کا فیصلہ ہوا ہے،ہمارا فیصلہ تحریک چلانے کا ہے وہ کامیاب ہوتی ہے یا نہیں یہ بعد کی بات ہے، جے یو آئی ماضی میں بھی کئی تحاریک چلا چکی ہے ۔