سنگاپور (شِنہوا) سنگاپور بزنس فیڈریشن (ایس بی ایف) کے چیئرمین مارک لی نے کہا ہے کہ سنگاپور کی کاروباری کمپنیوں کے لئے چین کی بین الاقوامی درآمدی نمائش (سی آئی آئی ای) میں شرکت کی اہمیت وقت گزرنے کے ساتھ مزید بڑھ رہی ہے۔ اس نمائش کا 9واں ایڈیشن 5 سے 10 نومبر تک شنگھائی میں منعقد ہوگا۔
مارک لی نے شِنہوا کو ایک حالیہ انٹرویو میں کہا کہ بہت سی کمپنیاں ابتدا میں اپنی مصنوعات اور کاروبار متعارف کرانے اور چینی منڈی کے بارے میں معلومات حاصل کرنے کے لئے اس نمائش میں شرکت کرتی ہیں۔ تاہم کئی سالوں کے دوران یہ ابتدائی روابط تجارتی معاہدوں، مشترکہ منصوبوں اور بعض صورتوں میں ایسے علاقائی کاروباری اشتراک میں تبدیل ہو جاتے ہیں جن کا دائرہ چین سے آگے جنوب مشرقی ایشیا تک پھیل جاتا ہے۔
سنگاپور بزنس فیڈریشن مسلسل 9 ویں سال اس نمائش میں شرکت کر رہی ہے۔ اس سال فیڈریشن 54 سنگاپوری کمپنیوں کے وفد کی قیادت کرے گی، جو خوراک، مینو فیکچرنگ، اشیائے صرف اور پیشہ ورانہ خدمات سمیت مختلف شعبوں میں اپنی صلاحیتوں کا مظاہرہ کریں گی۔
شرکت کرنے والی کمپنیوں میں بائیوٹیکنالوجی کی کمپنی مِرکسز بھی شامل ہے، جو اس نمائش میں تیسری مرتبہ شرکت کر رہی ہے اور اس بار پہلے سے زیادہ بڑے پیمانے پر اپنی مصنوعات اور خدمات پیش کرے گی۔ سنگاپور کی خوراک تیار کرنے والی کمپنیوں نیچوری انٹرپرائز، کم گوان گوان کافی اور تائی ہوا نے بھی اس پلیٹ فارم کے ذریعے کاروباری اشتراک کو فروغ دیا ہے۔
مارک لی نے کہا کہ یہ مثالیں ظاہر کرتی ہیں کہ چین کی بین الاقوامی درآمدی نمائش ان کمپنیوں کی مختلف مراحل پر معاونت کر سکتی ہے جو چینی منڈی میں کاروبار شروع کرنے سے لے کر طویل المدتی شراکت داری قائم کرنے تک کے سفر پر ہیں۔انہوں نے مزید کہا کہ سنگاپور کے سرکاری ادارے انٹرپرائز سنگاپور کے تعاون سے سنگاپور بزنس فیڈریشن ان کمپنیوں کو ایک مضبوط اور متحد قومی تجارتی پلیٹ فارم کے تحت یکجا کرتی ہے۔