ہرارے (شِنہوا) زمبابوے کے دارالحکومت ہرارے میں منعقدہ 3 روزہ چین۔زمبابوے کماڈٹی ایکسپو اور روزگار میلے میں چین کے ہیوی ڈیوٹی ٹرک برانڈز نے شرکاء کی بھرپور توجہ حاصل کی۔ نمائش اتوار کو اختتام پذیر ہوئی۔ ان ٹرکوں میں مقامی سطح پر بڑھتی ہوئی دلچسپی قابل اعتماد تجارتی گاڑیوں کی بڑھتی ہوئی طلب کی عکاسی کرتی ہے۔شاکمان، ہووو، فوٹون اور ڈونگ فینگ سمیت چینی ٹرک برانڈز نے زمبابوے میں تجارتی نقل و حمل، کان کنی، تعمیرات اور طویل فاصلے تک مال برداری کے شعبوں میں اپنی جگہ بنا لی ہے۔ یہ گاڑیاں ملک کے ٹرانسپورٹ اور لاجسٹکس نیٹ ورک کا ایک اہم حصہ بن چکی ہیں۔تجارتی گاڑیاں فراہم کرنے والی کمپنیوں کے لئے اس نمائش نے کاروباری روابط قائم کرنے اور ممکنہ شراکت داری کے مواقع تلاش کرنے کا پلیٹ فارم فراہم کیا۔تجارتی گاڑیوں اور خدمات فراہم کرنے والی کمپنی گرین پاور وہیکل زمبابوے کے سیلز ڈائریکٹر تان جئی تینگ نے کہا کہ ’’ہم اس نمائش کو اپنی مصنوعات اور برانڈ کے فروغ کے لئے استعمال کرنا چاہتے ہیں۔ ہمارا یقین ہے کہ یہ نمائش چینی اور زمبابوے کے صارفین کے سامنے اپنی مصنوعات پیش کرنے کا ایک اچھا موقع فراہم کرتی ہے۔زمبابوے میں شاکمین کے سیلز ڈائریکٹر ہان شی ہوئی نے کہا کہ چینی ٹرک مقامی مارکیٹ میں مقبول ہیں کیونکہ وہ یہاں کے آپریٹنگ حالات سے مطابقت رکھتے ہیں۔انہوں نے کہا کہ’’بہت سی کمپنیاں اس گاڑی کو خریدنے میں دلچسپی رکھتی ہیں، جسے مقامی مارکیٹ کی ضروریات پوری کرنے کے لئے تیار کیا گیا ہے۔گاڑیوں کی کارکردگی کے علاوہ نمائش میں آنے والے متعدد افراد نے مرمت و دیکھ بھال اور سپیئر پارٹس کی دستیابی سمیت بعد از فروخت خدمات کے بارے میں بھی معلومات حاصل کرنے میں دلچسپی ظاہر کی۔تجارتی ٹرکوں کے علاوہ چینی مسافر گاڑیوں، خصوصاً الیکٹرک گاڑیوں نے بھی نمائش میں شرکاء کی توجہ حاصل کی۔