بیجنگ (شِنہوا) چینی وزارت خارجہ کی ترجمان ماؤ ننگ نے کہا ہے کہ چینی مین لینڈ اور تائیوان ایک ہی چین کا حصہ ہیں اور آبنائے تائیوان میں یہی حقیقی صورتحال ہے۔
ماؤ نے یہ بات پیر کے روز معمول کی پریس بریفنگ کے دوران کہی۔ ان سے تائیوان رہنما لائی چھنگ تے کی جانب سے ہفتے کے روز تائی پے میں ایک تقریر کے دوران ’’تائیوان کی آزادی‘‘ کے لئے بیرونی حمایت حاصل کرنے کی کوشش کے بارے میں سوال کیا گیا تھا۔
انہوں نے کہا کہ لائی چھنگ تے کے بیانات یا اقدامات کچھ بھی ہوں، وہ اس تاریخی اور قانونی حقیقت کو تبدیل نہیں کر سکتے کہ تائیوان چین کا حصہ ہے۔ اسی طرح وہ ’’تائیوان کی آزادی‘‘ کی ناکامی کے یقینی انجام کو بھی نہیں بدل سکتے اور نہ ہی اس بڑے رجحان کو روک سکتے ہیں کہ چین بالآخر دوبارہ متحد ہو جائے گا۔
انہوں نے کہا کہ لائی چھنگ تے جس نام نہاد جمہوریت کا پرچار کرتے ہیں، وہ ان کے علیحدگی پسندانہ ایجنڈے کو چھپا نہیں سکتی۔
ترجمان نے کہا کہ تائیوان کی چین میں واپسی دوسری عالمی جنگ میں فتح کے نتیجے میں حاصل ہونے والی کامیابیوں اور جنگ کے بعد قائم ہونے والے بین الاقوامی نظام کا ایک اہم حصہ ہے۔