جکارتہ (شِنہوا) انڈونیشیا کے صدر پرابوو سوبیانتو نے شمالی مالوکو کے وسطی علاقے ہلماہیرا میں واقع ویڈا بے صنعتی پارک میں چین کی معاونت سے قائم 11 صنعتی منصوبوں کا افتتاح کر دیا۔ جن پر تقریباً 10.2 ارب امریکی ڈالر کی سرمایہ کاری کی گئی ہے۔
پرابوو نے صنعتی پارک سے چینی کمپنیوں کے تیار کردہ الیکٹرک گاڑیوں (ای وی) کی بیٹریوں کی پہلی برآمد کا بھی مشاہدہ کیا۔
انہوں نے کہا کہ یہ برآمد قدرتی وسائل کی قدر بڑھانے اور الیکٹرک گاڑیوں کی صنعت کو فروغ دینے کی حکومتی پالیسی میں ایک اہم پیش رفت ہے۔
پرابوو نے کہا کہ یہ اس بات کا واضح ثبوت ہے کہ قدرتی وسائل کو ملک کے اندر پراسیس کرکے ان کی قدر بڑھانے کی ہماری پالیسی درست سمت میں آگے بڑھ رہی ہے اور ہم اسے مزید آگے بڑھانے کی ہر ممکن کوشش جاری رکھیں گے۔
پرابوو کے مطابق اس صنعتی پارک میں مجموعی سرمایہ کاری 20 ارب ڈالر سے تجاوز کر چکی ہے جبکہ مستقبل میں توسیع کے لئے مزید 7 ارب ڈالر کی سرمایہ کاری کا منصوبہ ہے۔ اس صنعتی زون کی تعمیر و ترقی شروع ہونے کے بعد سے اب تک ایک لاکھ سے زیادہ افراد کو روزگار فراہم کیا جا چکا ہے۔