یروشلم (شِنہوا) اسرائیلی وزیراعظم بنیامین نیتن یاہو نے کہا ہے کہ فلائی دبئی کی پرواز میں حملے میں ملوث معاون پائلٹ نے طیارہ گرانے کی کوشش کی تھی۔ انہوں نے کہا کہ اسرائیل اس واقعے کے ممکنہ ذمہ داروں کے بارے میں تحقیقات کر رہا ہے۔ نیتن یاہو نے ریکارڈ شدہ ویڈیو بیان میں کہا کہ وقت گزرنے کے ساتھ صورتحال مزید واضح ہو رہی ہے۔ انہوں نے الزام عائد کیا کہ معاون پائلٹ شدت پسندی کی طرف مائل ہوا اور تمام مسافروں سمیت طیارہ گرانے کے ارادے سے آیا تھا۔نیتن یاہو نے کہا کہ ہم تحقیقات کر رہے ہیں کہ آیا اسے کسی نے بھیجا تھا اور جس نے بھی اسے بھیجا ہوگا، اسے اس کی بہت بھاری قیمت چکانا پڑے گی۔یہ واقعہ بدھ کو دبئی سے تل ابیب جانے والی فلائی دبئی کی پرواز میں پیش آیا۔ الزام ہے کہ معاون پائلٹ نے کاک پٹ میں کپتان پر حملہ کرکے اسے چاقو مارا، جس کے باعث طیارہ اچانک تیزی سے نیچے کی جانب جانے لگا۔ بعد ازاں عملے کے ارکان اور مسافروں نے معاون پائلٹ کو قابو کر لیا۔متحدہ عرب امارات (یو اے ای) کے اٹارنی جنرل نے جمعرات کو واقعے کی تحقیقات کا حکم دیا۔ یو اے ای کے صدارتی مشیر انور قرقاش نے جمعہ کو اس حملے کو دہشت گرد کارروائی قرار دیا۔