واشنگٹن (شِنہوا) پینٹاگون مشرق وسطیٰ میں تیسرا طیارہ بردار جنگی بیڑا اور میرین کور کے مزید بحری جہاز بھیج رہا ہے جس کے نتیجے میں خطے میں مزید 9 ہزار سے 10 ہزار امریکی فوجی تعینات کئے جائیں گے۔
وال سٹریٹ جرنل کی رپورٹ میں امریکی حکام کے حوالے سے بتایا گیا ہے کہ یہ بحری جہاز، جنگی طیارے، میرینز اور ملاح نومبر کے آخر تک خطے میں پہنچ جائیں گے۔
2 طیارہ بردار بحری بیڑے یو ایس ایس جارج ایچ ڈبلیو بش اور یو ایس ایس جارج واشنگٹن پہلے ہی مشرق وسطیٰ میں موجود ہیں۔ طیارہ بردار بحری جہاز یو ایس ایس تھیوڈور روز ویلٹ اتوار کو مقررہ تعیناتی کے لئے اپنے آبائی اڈے سان ڈیاگو سے روانہ ہوا۔
رپورٹ کے مطابق اگر یو ایس ایس جارج واشنگٹن روز ویلٹ کے پہنچنے کے بعد بھی خطے میں موجود رہا تو اپریل کے بعد پہلی مرتبہ مشرق وسطیٰ میں 3 طیارہ بردار جنگی بیڑے موجود ہوں گے۔
جمعرات کو امریکی صدر ڈونلڈ ٹرمپ نے تعطل کا شکار مذاکرات کے دوران ایک بار پھر دھمکی آمیز بیان دیا۔ انہوں نے وائٹ ہاؤس میں کہا کہ ایران اگر منصفانہ معاہدے پر دستخط نہیں کرتا تو ’’مزید موجود نہیں رہے گا‘‘۔